Бүгүн Ленин болуоссатыгар Дьокуускай-Мииринэй хайысханан бэлисипиэтинэн айаннаан иһэр Ольга Семенованы уонна Ангелина Петрованы кытта көрсүһүү буолла. Кинилэр бэлисипиэти тэбиинэн анаан 1998 с. дьарыктаналлар. Идэлэринэн иккиэн педагогтар Ангелина алын кылаас, Ольга физика учууталлара. Билигин идэлэриттэн атын эйгэҕэ үлэлии-хамсыы сылдьаллар.
Уһун айаҥҥа туруналларыгар кыһыҥҥыттан бэлэмнэммиттэр. От ыйын 7 күнүгэр Дьокуускайтан турунан, бүгүн Сунтаарга тиийэн кэлбиттэр. Күҥҥэ 100 км тэбэн, аара нэһилиэктэргэ тохтоон хонон ааһаллар эбит. Манна биир күн сынньанан баран сарсын айаннарын салгыыллар. “Велопробегпыт сыала — чөл олоҕу пропагандалааһын. Успуордунан дьарыгырар хаһан да хойут буолбатах. Чугас дьоммут өйдүүр- өйүүр буоланнар сыалбытын-сорукпутун толоробут», — диир Ангелина.
Тулуурдаах, дьулуурдаах кэрэ аҥаардарга этэҥҥэ айаны, соруктарын ситиһэллэригэр баҕарабыт.
Алена ИВАНОВА