Быйыл улууспутугар икки бүк эппиэтинэстээх сыл, бастакытынан Улуу Кыайыы өрөгөйдөөх 80 сылын уонна С.А.Зверев-Кыыл Уолун 125 сыллаах үбүлүөйдээх ыһыаҕа Сунтаарбытыгар тэриллиэҕэ. Бу улахан суолталаах тэрээһиннэри ыытарга бүгүн улуус дьаһалтатын аактабай саалатыгар бэлэмнэнии үлэтин чопчулуур, торумнуур сыаллаах нэһилиэк баһылыктарын уонна тэрилтэ салайааччыларын кыттыылаах сүбэ мунньаҕа буолла. Мунньаҕы улуус баһылыга Анатолий Григорьев, улуус баһылыгын бастакы солбуйааччыта Павел Григорьев, улуус баһылыгын социальнай уонна имиджевай бэлиитикэҕэ солбуйааччыта Альберт Иванов салайан ыыттылар.
Суолталаах тэрээһиннэри үрдүк таһымҥа ыытар сыаллаах хамыыһыйалар тэриллэн бэлэмнэнии үлэтэ ситимнээхтик бара турар. Ол курдук, улууска үлэлии турар «Кыайыы-75» пуондаҕа харчынан биир кэмнээх көмө хомулларын туһунан нэһилиэк баһылыктарыгар, тэрилтэ слайааччыларыгар тоһоҕолоон эттилэр. Пуондаҕа киирбит харчынан хорсун буойуттарбыт ааттарын үйэтитэргэ Албан аат искибиэрин, нэһилиэктэргэ баар Аҕа дойду сэриитин кыттыылаахтарыгар анаммыт өйдөбүнньүктэр өрөмүөннэригэр уонна буола турар анал байыаннай дьайыы кыттыылаахтарыгар көмөҕө барыаҕа.
Кыайыы күнүн көрсүүгэ сэлэлии хаамыыга уонна өлбөт-сүппэт полкаҕа маассабай тахсыыны күүһүрдэргэ, тыыл бэтэрээннэригэр, сэрии сылын оҕолоругар күүстээх болҕомто ууруллара салҕанан барыахтааҕын туһунан улуустааҕы бэтэрээннэр сэбиэттэрин бэрэссэдээтэлэ Афанасий Васильев туһаайан эттэ.
Ытык киһибит С.А.Зверев-Кыыл Уола төрөөбүтэ 125 сылыгар аналлаах тэрээһиннэр киэҥ далааһыннаахтык ыытыллан саҕаланнылар. Улуус култууратын салайааччыта Саргылаана Омукова бэлиэ сыл чэрчитинэн ыытыллар тэрээһиннэри, өрөспүүбүлүкэтээҕи ыһыах былаанын иһитиннэрдэ. Маны сэргэ ыһыахтыыр паарканы тупсарыыга трибуна, ураһа тутууларын чопчуластылар.
Түмүккэ хаалбыт кылгас кэмҥэ бэлэмнэнии күргүөмнээхтик барыахтааҕын бэлиэтээтилэр. Элбэх ыалдьыт тоҕуоруһа мустарыгар тупсарыы, сибэкии олордуутун үлэтэ барарын санаттылар.
Алена ИВАНОВА