Ил Дархан Айсен Николаев бастыҥ педагог-настаабынньык бириэмийэ олохтуур туһунан соруга 2023 сылтан олоххо киирэн, быйыл иккис төгүлүн ыытыллар. Күрэс кыттааччыларын улуус уонна куорат уокуруктара бэйэлэрэ талан ылаллар. Манна уһуйаан, оскуола, эбии үөрэх уонна орто анал үөрэх кыһаларыттан кыттыахтарын сөп.
Бу күннэргэ Сунтаар улууһугар «Бастыҥ педагог-настаабынньык-2024» күрэс түмүктэннэ. Бу туһунан Сунтаар улууһун үөрэҕириитин салалтатын салайааччытын 1 солбуйааччы Владимир Уаров иһитиннэрдэ:
«Быйылгы күрэскэ биэс уһуйааччы кытынна. Ол курдук, Елизавета Данилова — Сунтаардааҕы алын сүһүөх оскуолатын учуутала, Ангелина Николаева — Сунтаардааҕы 3-с нүөмэрдээх оскуолаҕа омук тылын учуутала, Антонина Прокопьева — Сунтаардааҕы 1-кы нүөмэрдээх оскуолатын нуучча тылыгар уонна литературатыгар учуутала, Алена Сергеева — Сунтаардааҕы гимназияҕа музыка уонна эбии үөрэхтээһин уһуйааччыта, Мария Трофьянова — Күндэйэ оскуолатын уруһуйга, черчениеҕа уонна технологияҕа учуутала. Улуус эбии үөрэхтээһин тэрилтэтиттэн, үөрэҕирии салалтатыттан уонна оскуола, профком үлэһиттэриттэн чилиэттэри талан 7 киһилээх экспертнай хамыыһыйа тэриллэн үлэлээтэ. Ону тэҥэ куйаар ситимин нөҥүө куоластааһын ыытылынна. Быйылгы күрэс куоластааһына сүрдээх тыҥааһыннаах буолан биэрдэ. Ол аата, бу күрэс өссө күүскэ киэҥ эйгэҕэ сырдатыллан, бары кыттааччыларга элбэх дьон-сэргэ болҕомтотун ууран туран, куоластааһын барда диэххэ наада. 4 күн устата ыытыллыбыт куоластааһыҥҥа Елизавета Петровна уонна Ангелина Николаевна тилэх баттаһа истилэр. Ол курдук күрэс балаһыанньатын хас биирдии ирдэбилин тутуһан туран, сүрдээх эппиэтинэстээхтик уонна чиэһинэйдик кыттааччылар портфолиоларын көрөн, үөрэтэн сөптөөх сыанабыл биэрэн уонна куйаар ситиминэн ыытыллыбыт куолас түмүгүнэн биир кыайыылааҕы таһаардыбыт. Ол курдук 51 сыл уһуйааччы идэтигэр эҥкилэ суох үлэлээбит, баай уоппуттаах, элбэх эдэр көлүөнэ учууталга күүс-көмө, сүбэ-ама биэрбит РФ уопсай үөрэхтээһин бочуотунай үлэһитэ, «Лучшие учителя России» ПНПО кыайыылааҕа, СӨ үөрэҕирии туйгуна, СӨ учууталлар учууталлара, «Дети Саха Азия» норуоттар икки ардыларынааҕы оҕо пуондатын стипендиата, РФ бэрэсидьиэнин гранын хаһаайката, Сунтаар улууһун Аҕа баһылыгын граныгар «Учитель — лидер образования» номинация хаһаайката, «За вклад в развитие Сунтарского наслега» бочуоттаах бэлиэ хаһаайката Елизавета Петровна Данилова кыайыылаах үрдүк ааты ылла. Бэлиэтээн этиэм этэ, үөрэхтээһин эйгэтигэр саҥа үлэлээн эрэр уонна үлэлии сылдьар эдэр үлэһиттэргэ анаан, кинилэр үлэлэрэ таһаарыылаах буоллун диэн, быйылгы үөрэх дьылыгар аҕа сүбэһит уһуйааччыларбыт баай уопутттарын тарҕатар сыаллаах, улууспутугар сэминээр ыытыахпыт. Онтон кэлин эрэгийиэн, өрөспүүбүлүкэ таһымыгар таһаарыахпыт».
Елизавета ТИТОВА