Олох уйгутун уһансар, тыа сиригэр саамай тутаах үлэһит – тырахтарыыс идэлээх дьон буолаллар. Кинилэр дьыл хайа да кэмигэр буһан-хатан тыа сиригэр тыын суолталаах, үгүс дьүккүөрдээх үлэни кыайа-хото туталлар. Оттон, күн бэҕэһээ кинилэргэ анаан Уһун Күөл нэһилиэгэр улуустааҕы «Механизатордар-2025» күрэх бэрт сэргэхтик буолан ааста.
Төрдүс төгүлүн ыытыллар быйылгы күрэх Улуу Кыайыы 80 сылын көрсө, Арассыыйа уонна ДНР Дьоруойа Дмитрий Егоров – «Сунтар» төрөөбүтэ 50 сылыгар ананна. Сунтаар улууһун дьаһалтата, тыа хаһаайыстыбатын салалтата уонна Арыылаах нэһилиэгин дьаһалтата үрдүк таһымҥа тэрийэн ыыттылар. Ол курдук, уопсайа аҕыс нэһилиэктэн 18 туруу үлэһит механизатордар күөн көрсөн бастыҥнар ааттарын былдьастылар. Күрэхтэһээччилэр маҥнай утаа теория чааһыгар тиэхиньикэҕэ, сэрэхтээх буолууга уонна суол быраабылатыгар боппуруостарга эппиэттээн билиилэрин тургуттулар. Дьэ, ол кэннэ күөл үрдүгэр тахсан күөрэччи анньыллыбыт былаахтардаах анал былаһааккаҕа биир-биир МТЗ-82 тыраахтыр уруулун эрийэн, сыа-сым курдук туттан илин-кэлин түһүстүлэр. Нөҥүө-маҥаа икки 100 м. тэҥ кэрчиктээх былаһааккаҕа улахан бэрэбинэни сыһан-соһон, тиэйэн-көтөҕөн тыраахтыры гаражка киллэрэ охсуохтаахтар. Бэриллибит сорудаҕы ким төһө мүнүүтэҕэ толорбутун судьуйалар хонтуруоллууллар. Оттон, сыыһа-халты тутуннулар эрэ кыһыл былаах күөрэтэн ыстыраап ааҕан истилэр. Бу түһүмэххэ 1-кы миэстэни 4 мүн.07сөк. көрдөрүүнэн Илимнииртэн Николай Иванов ылары ситистэ, 2-с миэстэни 4 мүн.12 сөк. көрдөрүүнэн Күндэйэттэн Владимир Евсеев, 3-с миэстэҕэ 4 мүн. 30 сөк. Уһун Күөлтэн Валерий Уаров буоллулар. Салгыы «Фигурное вождение» түһүмэххэ тыраахтыры баҕаналар икки ардыларынан эрийэ-буруйа урууллаан, таһаҕаһы көтөхтөрөн, илдьэн-аҕалан бэлиэ миэстэтигэр уурдулар. Күрэх уопсай түмүгүнэн 1-кы м. Күндэйэттэн Владимир Евсеев, 2-с м. Күндэйэттэн Василий Елисеев, 3-с м. Уһун Күөлтэн Валерий Уаров тэҥнээхтэрин булбатылар.
Ыһыылаах-хаһыылаах, тиритиилээх-хорутуулаах күрэх таһынан туспа «Хаар айан» күрэҕэ буолла. Манна алта кыттааччы бэйэлэрин тыраахтырдарынан тоҥуу хаар устун биэтэккэ бастыыр иһин күрэхтэстилэр. Түмүккэ, 1-кы м. Руслан Иванов, 2-с м. Данил Еремеев, 3-с м. Валерий Уаров буоллулар.
Бу курдук, эмиэ да сылаас, эмиэ да тымыныы сааскы сайа охсор тыаллаах биир күн бэрт сэргэхтик ыытылынна. Олохтоохтор кэлбит дьону сылаас миининэн, итии чэйинэн, остуол хотойорунан күндүлээн олус үөртүлэр. Эт киһи элэйэр, сыа киһи сылайар күүрээннээх күрэҕэ үрдүк таһымҥа буолан ааста, кыттыбыт кыттааччылар бары илии тутуурдаах, өттүк харалаах астынан-дуоһуйан тарҕастылар.
Елизавета ТИТОВА