Ахсынньы 12 күнүгэр Дьокуускай куоракка Сунтаар улууһуттан сылдьар устудьуоннарбытын кытта көрүстүбүт. Ыччат отдела Сунтаар устудьуоннарын «Түмэн» уопсастыбаннай түмсүүлэрин кытта өрүү өйөһөн биир ситимнээхтик үлэлиибит. Устудьуоннар түмсүүлэрин ортолоругар биһиги «түмэннэрбит» бастыҥ үлэлээҕинэн, көхтөөх ыччаттааҕынан биллэллэр. Онтон биһиги олус үөрэбит.
Быйыл устудьуоннарбыт икки ардыларыгар «БАСТЫҤ» бириэмийэни ылар иһин куоластааһыны тэрийбиппит. Бу көрсүһүүгэ бириэмийэбит кыайыылааҕын чиэстээтибит уонна маны таһынан биэс ордук көхтөөх устудьуоҥҥа наҕараада туттардыбыт. Бу «БАСТЫҤ» бириэмийэни сылын аайы ыытар буолуохпут. Көрсүһүүгэ кэлбит устудьуоннары кытта инники былааннары торумнаатыбыт, бииргэ үлэлэһии тула сэргэх кэпсэтиини ыыттыбыт. Инники өттүгэр устудьуоннарбытын кытта биир санаанан түмсүүлээхтик үлэлиирбитин баҕарабыт.
Трофим ИВАНОВ.
