Бүгүн, ахсынньы 12 күнүгэр, С.А. Зверев-Кыыл Уолун аатынан улуустааҕы норуот айымньытын киинигэр Сунтаар улууһун ыччат бэлиитикэтин cалалтата сылы түмүктүүр «БАСТЫҤ — 2024» үөрүүлээх тэрээһини ыытта.
Үөрүүлээх тэрээһин саҕаланыан иннинэ дьиэ кэргэн быыстапката буолла. Улууспут нэһилиэктэриттэн дьиэ кэргэттэр кэлэн араас бэйэ оҥоһуктарын туруордулар.
Сунтаар улууһун баһылыга Анатолий Григорьев уонна ыччат бэлиитикэтин отделын салайааччыта Трофим Иванов көхтөөх ыччаты эҕэрдэлээн, кэлэн иһэр сылга өссө күүскэ түмсэн, биир санаанан салайтаран улууспут сайдарын туһугар үлэлиэххэ диэн ыҥырдылар.
Тэрээһиҥҥэ улууспут бастыҥ, чулуу актыбыыстарын, араас таһымнаах күрэхтэр кыайыылаахтарын, эдэр ыччат бэлиитикэтин сайдыытыгар кылааттарын киллэрсибиттэри наҕараадалаатылар.
Мустубут дьону ыҥырыылаах ыалдьыт, саха эстрадатын чаҕылхай сулуһа Арыйаан эҕэрдэлээтэ, ырыаларын бэлэхтээтэ.
Ону таһынан, Сунтаар улууһун ыччатын икки ардыларыгар сыл устата ыытыллыбыт спартакиада түмүгүн биллэрдилэр. Ол курдук, кыра нэһилиэктэр ыккардыларыгар: 3-с Хадан, 2-с Күүкэй, бастакы үрдэли ылла Устье нэһилиэгэ.
Орто нэһилиэктэр ыккардыларыгар: 3-с Арылаах, 2-с Дьаархан, бастакы үрдэли ылла Кэмпэндээйи нэһилиэгэ.
Оттон улахан нэһилиэктэр 3-с Сиэйэ, 2-с Элгээйи, бастакы үрдэли ылла Тойбохой нэһилиэгэ.
Дмитрий ЫМЫЧАНОВ