Улууспутугар 2024 сылга уопсайа 21 сынньалаҥ уонна доруобуйаны бөҕөргөтөр лааҕыр 835 оҕону хабан үлэлиэҕэ. Оҕолор сайыҥҥы сынньалаҥнарын тэрийии билигин улахан болҕомтону уонна эппиэтинэһи эрэйэр. Сылын ахсын үөрэх управлениетын нөҥүө Сунтаар улууһугар сайыҥҥы сынньалаҥ үс түһүмэҕинэн ыытыллар. Ол курдук, 1 түһүмэххэ бэс ыйын 5-26 күннэригэр 20 лааҕыр 565 оҕону хабан үлэлээтэ. Ол иһигэр 14 күнүскү лааҕыр – «Саха сайдам оҕото» (Сунтаардааҕы алын сүһүөх оскуолата), «КусТУК» (Түбэй Дьаархан оскуолата), «Дебют» (оҕо дьоҕурун сайыннарар киин), «Арчы» (Сунтаар 1 №-дээх оскуолата), «Сайын» (Сунтаар 2 №-дээх оскуолата), «Айтал» (Сунтаардааҕы оҕо искусствотын оскуолата), «Мир открытий» (политехническай лиссиэй), «Мы вместе одна команда» (3 №-дээх оскуола), «Чыпчаал» (Элгээйи), «Дьулуур» (Кириэстээх), «Олоҥхо дойдута» (Тойбохой), «Надежда» (коррекционнай оскуола), «Сайын» (Бүлүүчээн), хонуктаах үс лааҕыр – «Альфа-Спасатель» (Күүкэй), «Спасатель» (Устье), “Ситис” (Бүлүүчээн, “Ситис” интеллектуальнай киин), биир үлэ лааҕыра “Быйаҥ” (Куокуну оскуолата), ону таһынан өрөспүүбүлүкэтээҕи «Сир Уустара» (Кэмпэндээйи), СӨ физическэй култууратын уонна успуордун министиэристибэтин нөҥүө «Эрэл» (А.И.Иванов аатынан олимпийскай эрэллэри бэлэмниир өрөспүүбүлүкэтээҕи спортивнай оскуола) лааҕырдар үлэлээтилэр.
Иккис сезонун бүгүҥҥүттэн, ол эбэтэр от ыйын 5 күнүттэн 26 күннэригэр диэри 5 лааҕыр үлэтин саҕалаата. Уопсайа 145 оҕо сынньанан, доруобуйатын чөлүгэр түһэрэн ааһыахтаах. Күнүскү өттүгэр икки лааҕыр – «Өлгөм» (Бордоҥ оскуолата), «Сайын», «Быйаҥ» үлэ лааҕыра (Куокуну оскуолата), өрөспүүбүлүкэтээҕи «Сир Уустара» лааҕыр, «Эрэл» күнүскү лааҕыра үлэлиэхтэрэ.
Анал байыаннай дьайыы кыттыылаахтарын дьиэ кэргэннэрин өйүүр сыаллаах бырагырааманан Дьокууйскай куорат лааҕырдарыгар – «Чэбдиккэ», «Сосновай Борга», «Дружба», «Энергетик» лааҕырдарга оҕолор сынньана сылдьаллар. «Сир Уустара» лааҕырга бу категорияҕа киирсэр оҕолор сменанан кэлэ тураллар. Күһүөрү атырдьах ыйыгар муораҕа сынньана барыахтара.
Саха сирин оҕо сынньалаҥын уонна доруобуйатын тупсарыы хамыыһыйатын уурааҕынан, Сунтаар улууһугар бэриллибит квотанан Туапсе куорат “Юбилейнай” лааҕырыгар Сунтаартан 10 оҕо сынньана сылдьар.
Саха Өрөспүүбүлүкэтин үөрэҕин уонна билимин министиэристибэтин уурааҕынан бэс ыйын 24-25 күннэригэр Дьокуускай куораттан оҕо сайыҥҥы сынньалаҥын тэрийии ресурснай киинин старшай методиһа Ульяна Чупрова кэлэн Сунтаар улууһун хонуктаах «Ситис», «Альфа-Спасатель», «Спасатель», «Сир Уустара» лааҕырдары көрөн-истэн, бэрэбиэркэлээн барда. Түмүккэ лааҕырдар сөпкө тэриллэн үлэлии олороллоро бэлиэтэннэ.
РФ Үөрэх министиэристибэтин иһинэн үлэлиир «Физическэй иитиини хааччыйар федеральнай тэрийэр-методическай киин» бастыҥ оҕо сынньалаҥын уонна доруобуйатын бөҕөргөтөр лааҕырдары киэҥ эйгэҕэ таһаарарга диэн соруктаах Саха сириттэн икки лааҕыры талла. Онно Дьокуускай куораттан «Сосновай Бор», ону таһынан биһиги улууспутуттан «Альфа-Спасатель» диэн хонуктаах лааҕырдара киирдилэр. Онон бу икки лааҕыр туһунан киин сиртэн кэлэн киинэҕэ устуохтара, кинилэр үлэлэрин сырдатыахтара.
Анастасия МЕРКУРЬЕВА,
улуустааҕы үөрэҕирии управлениетын иитии уонна
эбии үөрэхтээһин отделын сүрүннүүр исписэлииһэ.