Валерий Алексеевич Прокопьев улууска кадровай булчут, бөрөһүт быһыытынан биллэр. Байанайдаах булчут аатын үйэтитэр сыаллаах кини төрөппүт уола Василий Прокопьев, Сунтаар нэһилиэгин баһылыга Эдуард Филиппов уонна «Булчут» ХЭТ салайааччыта Максим Афанасьев сүбэлэһэн баран, сааскы бастакы булт күрэҕин тэрийбиттэрэ. Бу подсадной куһунан бултааччыларга анаммыт күрэс буолар. Бастакы күрэс 2021 сыллаахха Сунтаар нэһилиэгэр тэриллибитэ. Ол кэнниттэн улуус таһымнаах буола кубулуйда. Бу күрэһи эр дьон олус сэргиир.
Күрэс подсадной кустааһыны көҕүлүүр эрэ буолбакка, ыал аҕата уолун булта-алка илдьэ сылдьан, сиэри-туому билиһиннэрэн, булт, сааны туттуу, харайыы быраабылаларын үөрэтэр сыаллаах. Чахчыта да, булка-алка сылдьыы сиэрин, уоттан, сааттан сэрэхтээх буолууга төрөппүт киһи үөрэтэрэ-такайара улаатан эрэр уолга ордук тиийимтиэ, өйдөнүмтүө буолара саарбаҕа суох.
Балаһыанньа быһыытынан күрэс муус устар 25 күнүгэр сарсыарда тыҥ хатыыта саҕаламмыта.Ол кэннэ сааһыттар бастакы кустарын хас чааска өлөрбүттэринэн видеоҕа устан, хаартыскаҕа түһэрэн дьүүллүүр сүбэҕэ ыыппыттара. Дьүүллүүр сүбэ үс кыайыылааҕы быһаарбыта.
Ол курдук, бастакы көҕөнү бултаан Кутанаттан Алексей Потапов бастакы миэстэ буолла. Кини 200 устуука ботуруонунан уонна «Ремингтон» маҕаһыынтан атыылаһарга 10 тыһ. солк. суумалаах сэртипикээтинэн наҕараадаланна.
Василий Егоров моонньоҕону ытан иккис миэстэни ылан, 100 устуука ботуруону кытары сыаналаах бирииһинэн бэлиэтэннэ. Оттон Сергей Тен бастакы чыркымайын хаартыскаҕа хатаан, видеоҕа устан ыытан үһүс миэстэни ылла. Киниэхэ эмиэ 50 устуука ботуруон уонна сыаналаах бириис туттарылынна. Булчут, сааһыт эр бэртэрэ ботуруон бириистэнэн олус табылыннылар, астынннылар. Ону таһынан дьүүллүүр сүбэ бэйэтин бирииһин Айсиэн Афанасьевка туттарда.
Прокопий Иванов салайааччылаах Сунтаар улууһун социальнай-экономическэй сайдыыга пуондата, Валерий Алексеевич дойдута – Күүкэй нэһилиэгэ, «Булчут» ХЭТ, «Спецстрой-П» тэрилтэ быйылгы күрэс сүрүн партнердарынан буоллулар, күрэстэһээччилэргэ сүрдээх үчүгэй бириистэри туруордулар.
Яина ВЛАСЬЕВА