Бары күүһү саахалы туоратыыга

Кыстыкка киирээппитин кытта Сунтаар нэһилиэгин килбэйэр киинигэр турар 5 этээстээх уопсай дьиэҕэ саахал таҕыста диэн иһитиннэрии киирдэ. Ол курдук, бу дьиэ өрөбүлтэн (баскыһыанньаттан) саҕалаан куһаҕан ууну-хаары ыытар турбалара (септига) тоҥон олохтоохторго улахан кыһалҕаны үөскэттэ. Бу дьиэ 2017 с. тутуллан киирбитэ. Сунтаарга бастакы 5 этээстээх улахан дьиэ буолар. Кыбартыыратын ахсаана — 103. Биллэн турар, бу толору хааччыллыыллаах уопсай дьиэҕэ аҕам саастаах, кыракый оҕолоох ыаллар бааллар. Кинилэр 4-с күннэрин уута-хаара суох олороллор. Сорох олохтоохтор билэр дьоннорунан, аймахтарынан тарҕаспыттарын туһунан биһиги редакциябыт үлэһиттэригэр кэпсээтилэр.
Бүгүҥҥү күн туругунан уопсай дьиэ саахалыгар “Жилкомсервис” (сал.Яковлев И.Р.) тэрилтэтин, “ОДьКХ” Сунтаардааҕы салаатын (сал. Петров М.Ю.), Сунтаар нэһилиэгин дьаһалтатын үлэһиттэрэ тоҥмут турбалары ириэриигэ уонна саҥаттан тардыыга күргүөмүнэн үлэлии таҕыстылар. Онтон дьиэни көрөр-истэр “Сунтаржилсервис” (Кыштымов М.С.) тэрилтэтэ үлэһиттэргэ туттар матырыйаалы түргэн кэм иһинэн булууга эппиэттиир. Этиэҕи баҕарыллар, маннык быһылаан тахсыбытыгар бу үөһэ ыйыллыбыт тэрилтэлэр тахсыбыт балаһыанньаттан туора турбаккалар эрэ тиэхиньикэнэн да буоллун, үлэһит илии ахсаанынан да буоллун кыһалҕаны түргэн кэм иһинэн быһаарарга үлэлиир бэлэмнээхтэрин эппиттэрэ хайҕабыллаах. Павел Григорьев Сунтаар улууһун баһылыгын бастакы солбуйааччыта: “Бу тахсыбыт балаһыанньаны миэстэтигэр тиийэн үөрэттибит. Олохтоохтору кытта көрүстүбүт. Билигин тэрилтэлэри түмэ тардан бары күүһү саахалы туоратыыга уурдубут. Уопсай дьиэ уу барар ситимин саҥаттан тардыыга уонна септик турбаларын ириэрэн холбуурга үлэ барар. Саахал тахсыбыт биричиинэтин тустаах уорганнар быһаарыахтара. Биһиги сүрүн сорукпут түргэн кэм иһинэн саахалы туоратыы буолар”.
Бүгүн нэһилиэк дьаһалтатын өттүттэн олохтоохторго анаан уу таһыыта олохтонуоҕа.

Мира АФАНАСЬЕВА