И.Г. Спиридонов аатынан Кириэстээх политехническай орто оскуолатын быйылгы бүтэрээччи выпуһа банкеттарын оннугар кылааһынан тутуспутунан Хабаровскай, Владивосток куораттарынан күүлэйдии, сири-дойдуну көрө көппүттэрэ. Кинилэри кылаас салайааччыта история уонна обществознание учуутала Аэлита Спиридонова уонна төрөппүт Сардана Жиркова салайан илдьэ сылдьаллар. Кинилэр билигин Владивосток куоракка бааллар. Бүгүн биһиги кылаас салайааччыта Аэлита Спартаковнаны кытта сибээскэ тахсан, айаннарын былаанын, оҕолор сынньалаҥнара төһө бэркэ баран эрэрин туһунан кэпсэттибит.
— Бу быйылгы выпуск кылааhы 5-с кылаастан иилээн-саҕалаан илдьэ сылдьабын. Оскуоланы 11 буолан бүтэрдилэр. Маннык бары тутуспутунан ыраата айаҥҥа барыахха диэн идиэйэ миэхэ кинилэр өссө 9-с кылааска сырыттахтарына киирбитэ. Бу иннинэ Москубаҕа, Санкт-Петербурга баран кэлбиттээхпит. Ону таһынан сорох оҕолорбун илдьэ Ильмень күөлгэ тиийэ бара сылдьыбыттаахпыт.
— Дьэ, бу айаҥҥытыгар бэлэмнэнии хайдах саҕаланна?
— 11-с кылааска киирбиттэрин кэннэ балаҕан ыйыттан төрөппүттэри кытта сүбэлэһэн, хас биирдиилэрэ ый аайы 2 тыһ. Солк. Мунньан саҕалыахха дэспиппит. Маны таһынан оҕолорбун кытта араас тэрээһиннэргэ кафе үлэлэтэн, эбии 75 тыһ. Киллэриммиппит. Онтубутун билигин таксибытыгар, океанариумҥа, эрэстэрээн депозитыгар эҥин тутта сылдьабыт. Төрөппүттэр ыам ыйыгар диэри муспуттара биирдии оҕоҕо 18 тыһ. Буолбута. Онтулара кэлэ-бара сөмөлүөттэрин билиэтин – 10 тыһ., ону таһынан поезд, гостиница төлөбүрүн уйунна. Харчыны эрдэ муһан саҕалаабыппыт үчүгэй эбит дэспиппит.
— Оскуоланы бүтэрээччилэргэ үгэс быһыытынан ыытыллар банкет оннугар ыраах тэлэһийэ айаннааһын сонун, туһугар хорсун, эппиэтинэстээх да идиэйэ…
— Уруккуттан да, походтарга эҥин сылдьан, кылааһым оҕолорун ханна эрэ ыраата атын сиргэ илдьиэхтээхпин диэн санаа миэхэ мэлдьи баар буолааччы. Оҕо киэҥ сиринэн сырыттаҕына, сири-дойдуну көрдөҕүнэ билиитэ хаҥыыр, сайдар. Бу иннинэ эрдэ оҕолору илдьэ араас бырайыактарынан кэлэ-бара үөрэммит буоламмын, ыарырҕаппакка илдьэ кэллим. Банкеты тэрийии ороскуотунааҕар быдан аҕыйах үп барда дии саныыбын.
— Төрөппүттэр бу идиэйэҕин тута өйөөбүттэрэ дуо?
— Төрөппүттэрбэр махталым улахан. Тута үөрэ-көтө өйөөбүттэрэ. Биир төрөппүтүм Сардана Пантелеймоновна манна кэлсэ сылдьар.
— Оҕолор төһө астыннылар? Инники күннэргэ былааҥҥыт?
— Үөрүү-көтүү бөҕөлөрө! Үксүлэрэ сөмөлүөтүнэн саҥа көттүлэр, поездка олорустулар, муораны көрдүлэр. Сынньалаҥмыт быыһыгар үөрэх тэрилтэлэригэр сылдьыахпыт. ДВФУ-га уонна Хабаровскайдааҕы үөрэх тэрилтэлэрин көрөр былааннаахпыт. Билигин Владивостоктааҕы ДВФУ-га сылдьарга пропуск оҥорторо сылдьабыт.
— Аэлита Спартаковна, быыс булан кэпсэппиккэр махтал буоллун. Айаҥҥытыгар ситиһиилэри, бэрт сынньалаҥы баҕарабыт.
Автор материала Марфа Иванова.