Бу күннэргэ анал байыаннай дьайыы кыттыылааҕа, Кутана хоһуун уола Василий сынньалаҥар кэлэ сылдьар. Байыас бу күннэрин дьонун-сэргэтин, биир дойдулаахтарын кытары ирэ-хоро кэпсэтэн атаара сылдьар. Төрөөбүт дойдутун сибиэһэй салгынынан тыынан, күүс-уох эбинэр, дойдутун ахтылҕанын таһаарар.
Бүгүн, муус устар 17 күнүгэр төрөөбүт дойдутугар Кутанаҕа нэһилиэгин дьаһалтатын (баһылык Николай Давыдов), орто оскуола тэрийиилэринэн үөрэнээччилэри, олохтоохтору кытары көрүстэ. Манна мустубут дьоҥҥо кини «биһигини мэлдьи өйүүргүтүгэр махтанабын» диэн эттэ. Оҕолорго үөрэхтэригэр ситиһиини, төрөөөбүт дойдугутун таптааҥ, дьиҥнээх патриот буола улаатыҥ диэн баҕа санаатын тириэртэ.
Нэһилиэк баһылыга Николай Васильевич байыаска истиҥ тыллаах махталын тириэртэ, дойдугар күүс-уох ыла сынньана кэлбитинэн эҕэрдэлээтэ. Байыаннай дьайыы буола турар сиригэр сылдьар уолаттарга туйгун доруобуйаны, этэҥҥэ сылдьалларыгар баҕарда уонна дьаһалта аатыттан Махтал сурук, өйдөбүнньүк бэлэх туттарда. Василий оскуолаҕа үөрэнэрин саҕана дириэктэрдээбит Капитон Никифоров эмиэ бэйэтин санаатын эттэ, байыаска этэҥҥэ буолууну баҕарда.
Василий 2022 сыллаахха 3 ыйга байыаннай хантараак түһэрсэн, СВО буола турар сиригэр сулууспалыы барбыта. Онтон хантараага бүтэн дойдутугар кэлэн баран, иккиһин 2023 сыл тохсунньутугар эмиэ барбыта. СВО-ҕа барыан иннинэ кини олохтоох кулуупка исписэлииһинэн үлэлээбит.
Биир дойдулаахтара Васяны нэһилиэк, улуус култуурунай, спортивнай олоҕор олус көхтөөх, үтүө саналаах киһи киэнэ килбиэнэ диэн этэллэр.
Көрсүһүүгэ байыаһы бииргэ үөрэммит доҕотторо, кэллиэгэлэрэ кэлэн эҕэрдэлээтилэр, үтүөнү баҕардылар. Көрсүһүү кыттыылаахтара уолу кытары ирэ-хоро кэпсэттилэр, үтүө санаа бастыҥын эттилэр.
Яина ВЛАСЬЕВА