Бүгүн улуус дьаһалтатын аактабай саалатыгар анал байыаннай дьайыыттан уоппускаҕа кэлэ сылдьар биир дойдулаахтарбытын Алексейы уонна Дениһи кытта көрсүһүү буолла. Бу манна улууспут баһылыгын социальнай уонна имиджевэй бэлиитикэҕэ солбуйааччы Гаврил Еремеев улууспут аҕа баһылыгын уонна дьаһалтатын аатыттан махтал суругу уонна саха быһаҕын үтүө баҕа санаатын этэн туран туттарда. Улуус үөрэххэ управлениетын салайааччытын солбуйааччы Борис Васильев оҕолор оҥорбут харысхалларын бэлэх туттарда. Уолаттар сулууспалыы барыахтарын иннинэ үлэлээбит тэрилтэлэрин салайааччылара, 1N-дээх оскуола дириэктэрэ Афанасий Матвеев уонна улуустааҕы казначейство управлениетын салайааччыта Юрий Васильев кэлэктиип аатыттан тус бэлэхтэрин туттардылар. Мустубут дьон этэҥҥэ сылдьан дойдугутар эргиллэн кэлээриҥ диэн уолаттарга алгыстарын эттилэр.
Алена ИВАНОВА
