Сунтаардааҕы «Харысхал» Аҕа дойдуну көмүскээччилэр дьиэ кэргэттэрин кэмитиэтэ анал байыаннай дьайыы байыастарыгар анаан, араас хабааннаах көмөнү тохтоло суох оҥоро тураллар.
Ол курдук байыастарга туох, хайдах көмө наадатын билэн, аҕыйах хонуктааҕыта госпиталларга бааһырыыны ылан эмтэнэ сытар уоллаттарбытыгар олус наадалаах биирдэ кэтиллэр ис таҥаһы тигэн саҕалаабыттара. Манна, олус элбэх баҕалаах дьон бэйэлэрин көмөлөрүн биллэрэн, байыастар тустарыгар кыһамньыларын уурса сылдьаллар. Иистэнньэҥнэр «Солнышко» уһуйаан уонна Сунтаардааҕы Лесной оскуола-инэринээт биэрбит матырыйаалларынан, «Илизарова» диэн ааттаммыт уустук эпэрээссийэ кэннэ туттуллар ис таҥаһы, халааты, ону таһынан сытар ыарыһахтарга малы-салы угарга табыгастаах, орон төбөтүгэр баайыллар, элбэх сиэптэрдээх мөһөөччүгү тигэллэр. Маннык ис таҥаһы тигэргэ, киэбин быһарга «Харысхал» волонтердара соторутааҕыта Ньурбатааҕы «Көмүскэл» штабын кытта көрсөн, уопут атастаһан кэлбиттэрэ.
Харысхаллар быһан бэлэмнээн биэрбит киэптэринэн күн бүгүн 28 халаат, 56 ис таҥас тигилиннэ. Өссө да үлэ салҕанар. Тигиллибит таҥастары сотору кэминэн Мииринэй куоракка илдьиэхтэрэ. Ол кэннэ байыастарга тиксэриэхтэрэ.
Елизавета ТИТОВА