Сунтаарбыт улууһугар анал байыаннай дьайыыга сылдьар биир дойдулаахтарбыт дьиэ кэргэттэригэр араас көмөлөр, тэрээһиннэр тиһигин быспакка ыытыллаллар. Холобур, сэтинньи 29 күнүгэр, Арассыыйаҕа Ийэ күнүгэр анаан «Дойдуну көмүскээччилэр» пуонда улуустааҕы филиалын социальнай координатора Варвара Яковлева көҕүлээһининэн, анал байыаннай дьайыыга сылдьар уолаттар ийэлэригэр анаан тэрээһин буолан ааста. Көрсүһүү Тойбохой нэһилиэгэр Корниловтар сынньалаҥ кииннэригэр тэрилиннэ.
Манна улуустааҕы Дьарыктаах буолуу киинин салайааччыта Александр Николаев, социальнай харысхал управлениетын салайааччыта Михаил Тимофеев, психологическай киин исписэлиистэрэ Надежда Тимофеева, Татьяна Антипина, Сунтаардааҕы дьиэ кэргэҥҥэ көмөлөһөр киин үлэһиттэрэ Людмила Пустолякова, Анастасия, Иван Ивановтар уонна кинилэр иитиллээччилэрэ кытыннылар.
Тэрээһини Сунтаардааҕы дьиэ кэргэҥҥэ көмөлөһөр киин үлэһитэ Людмила Николаевна сахалыы алгыс тылынан саҕалаата. Көрсүһүү олус истиҥ эйгэҕэ тэриллэн ыытылынна. Итии чэйдээх сандалыга олорон ирэ-хоро кэпсэттилэр, мунаахсыйар боппуруостарыгар ыйытыы биэрдилэр, туох көмө оҥоһулларын ыйыталастылар. Уйулҕаһыттар уопсай дебрифинг ыыттылар.
Ийэлэргэ Марианна, Сардаана Мироновалар, Анюта Васильева кэрэ куоластарынан ырыа ыллаан, флейтаҕа оонньоон эҕэрдэлэрин тиэртилэр. Анастасия, Иван Ивановтар ылбаҕай ырыаларын бэлэхтээтилэр. Түһүлгэҕэ баян доҕуһуолунан сахалыы ырыалар ылланнылар. Ийэлэр бэйэ-бэйэлэрин кытта сэһэргэһэн, санаа атастаһан астына сынньанан, тэрийээччилэргэ, чуолаан Варвара Яковлеваҕа махтал тылларын эттилэр.
Варвара Серафимовна бу тэрээһиҥҥэ көмөлөспүт урбаанньыт дьиэ кэргэн Елизавета, Ян Корниловтарга, Маар Күөл баһылыгын солбуйааччытыгар Христина Ивановаҕа, Уһун Күөл нэһилиэгин дьаһалтатын сүрүннүүр исписэлииһэ Саргылана Ивановаҕа күүс-көмө буолбуттарыгар, иилээн-саҕалаан ыыппыт Людмила Пустоляковаҕа улахан махталын тириэрдэр.
Алена ИВАНОВА