Байыастар дьиэ кэргэттэригэр муус ылан көмөлөһөллөр

Сунтаарбыт улууһугар халлаан биллэ тымныйан, кырыа кыһын тыына дьэ, биллиннэ. Оттон, олохтоохтор кыһын иһэр муустарын ылыытыгар тиргиллэллэр.

Бэҕэһээ, бүгүн Сунтаар нэһилиэгин дьаһалтата көҕүлээһининэн, нэһилиэк тэрилтэлэрин эр дьоно, анал байыаннай дьайыыга сылдьар байыастар дьиэ кэргэттэригэр кыстыыр муустарын ылыытыгар тоҕуоруһа мустан, күүстээх субуотунньук тэрийдилэр.

Субуотунньукка олохтоох дьаһалта, Ростелеком, Сунтаардааҕы РЭС, “Бартыһаан” норуот айымньытын театральнай киинэ, олох-дьаһах коммунальнай хаһаайыстыба, Сунтаардааҕы технологическай колледж, баһаарынай чаас, аэропорт, МАУ Сунтар, «Дабанстрой» ХЭТ, «Сунтаравтодор» ХЭТ үлэһиттэрэ уонна «Эр дьон сүбэтэ» түмсүү буолан кыттыстылар. Бүлүү эбэ үрдүгэр сарсыарда эрдэттэн  биир кэм сүгэ, эрбии тыаһын ньиргитэр тыастара иһиллэн олордо. Чардааттан мууһу ылан тута тиэхиньикэҕэ лөглөччү тиэйэн, сороҕун өрүскэ кэккэлэтэ сааһылаан уурдулар. Ылбыт мууһу уопсайа 52 ыал тиэргэнигэр тиэрдэн биэриэхтэрэ.

Бу курдук, хас биирдии тэрилтэ эр дьоно үлэттэн туора турбакка, байыастар дьиэ кэргэттэригэр көмөнү тиһигин быспакка оҥоро тураллар.

Елизавета ТИТОВА

Читайте дальше