Ахсынньы 19 күнүгэр, Кириэстээх нэһилиэгэр, анал байыаннай дьайыы кыттыылаахтарын дьиэ кэргэттэрин кэлэн иһэр саргылаах саҥа дьылынан эҕэрдэлиир үөрүүлээх күнэ буолла. Тэрээһини олохтоох дьаһалта, “Саргы түһүлгэтэ” култуура киинэ тэрийэн ыыттылар. Нэһилиэкпит баһылыга Александр Григорьев мустубут бар дьоҥҥо тус эҕэрдэтин, үтүө баҕа санаатын тириэртэ, бэҕэһээҥҥи Ил Дархан Анал этиитин тула көрүүлэрин эттэ. Маны сэргэ нэһилиэк тэрилтэлэрин салайааччылара эмиэ истиҥ эҕэрдэҕэ кыттыстылар, сэмэй бэлэхтэри туттардылар. Тэрийээччилэр мустубут дьоҥҥо бириистээх остуол оонньууларын ыытан, маанылаах сандалы тэрийэн олус истиҥник көрүстүлэр. Саҥа дьыл дьиктилээх, алыптаах күннэрэ нэһилиэкпитигэр саҕаланнылар.
Үүнэр сыл дьолу – соргуну, или-эйэни, доруобуйаны түстээтин. Хас биирдии дьиэ кэргэҥҥэ үөрүүнү үксэттин.
Людмила ДАНИЛОВА