Байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр көмө салгыы оҥоһуллар. Бэҕэһээ Сунтаар улууһун нэһилиэнньэтин дьарыктаах буолуутун киинин көҕүлээһининэн “Единый День участника специальной военной операции по РС (Я)» диэн байыаннай дьайыы кыттыылаахтарын дьиэ кэргэттэригэр мунаахсыйар боппуруостарыгар уонна сүбэ-ама биэрэр аналлаах тэрээһин буолла. Бу манна нэһилиэнньэ дьарыктаах буолуу киинин салайааччыта Александр Николаев, «Аҕа дойдуну көмүскээччилэр» пуонда Сунтаардааҕы филиалын салайааччыта Варвара Яковлева, психологическай киин филиалын психолога Татьяна Антипина, улуустааҕы социальнай харысхал управлениетын салайааччыта Михаил Тимофеев кыттыыны ыллылар.
Байыаннай дьайыы кыттыылаахтарын дьиэ кэргэттэриттэн 13 киһи кытынна. Бары кыттааччыларга дьарыктаах буолуу сулууспатын судаарыстыбаннай өҥөлөрүн, үлэ, профессиональнай үөрэхтээһин көрүҥүн уонна психологическай өйөбүлүн өҥөлөрүн туһунан иһитиннэриилэри оҥордулар. Ону тэҥэ, сайыҥҥы кэмҥэ сокуоннай саастарын ситэ илик оҕолору үлэлэтии быраабылаларын уонна социальнай хантараак туһунан консультациялар ыытылыннылар.
Байыаннайдар дьиэ кэргэттэрин чилиэннэрэ долгуйар ыйытыыларга хоруйдары ыллылар, сөптөөх эппиэттэри тутан ыытыллыбыт тэрээһин иһин махтаннылар.
Алена ИВАНОВА