Улуус 26 нэһилиэгэр быйыл баһылыктар отчуоттара ахсынньы 3 күнүттэн саҕалаан 10 күнүгэр түмүктэниэхтээх. Ахсынньы 3-5 күннэригэр 16 нэһилиэк баһылыктара нэһилиэнньэ иннигэр ыытыллыбыт үлэлэр, былааннар тустарынан кэпсээтилэр, олохтоохтор ааспыт өттүгэр туруорсубут боппуруостара төһө туолан иһэрин билиһиннэрдилэр. Отчуоту истиигэ улуус дьаһалтатыттан бэрэстэбиитэллэр, ону сэргэ нэһилиэктэр куратордара тахсан кытыннылар.
Ыытыллыбыт үлэ туһунан истэн баран, нэһилиэк олохтоохторо бэйэлэрин туруорсууларын этиннилэр. Холобур, Наахараҕа эдэр ыалга бэриллибит олорор кыбартыыраҕа өрөмүөнү, Түбэй Дьаархаҥҥа успуорт саалатын туруорустулар. Киин ититиниигэ холбонууга туох үлэ барарын ыйыталлар. Ону сэргэ ханна да буоларын курдук, ыт боппуруоһа күүскэ турар. Босхо, хаһаайына суох ыт олус элбээтэ дииллэр. Маар Күөлгэ Тойбохой-Маар Күөл икки ардыгар муниципальнай суол оҥоруутун туруорустулар. Күүкэй-Кутана муниципальнай суол оҥоруутун түбэйдэр эмиэ этиннилэр, уулуссалары сырдатыыга өссө үлэ барыан наадатын ыйдылар. Хоролор кулууптарын ситэри олбуордууру туруорустулар. Тэҥкэлэр киин хочуолунай тутуутун туруорсаллар эбит. Түбэйгэ Билайн сибээс мөлтөҕүн бэлиэтээн туран, атын сотобай сибээс оператордарын биһиэхэ кэлэн үлэлиэхтэрэ дуо? диэн сурастылар. Сунтаар нэһилиэгэр бөх тоҕор былаһааккалар тула кэпсэтии, быһаарсыы, өйдөммөт ыйытыылар трула кэпсэтии буолла. Хаһан да буоларын курдук ыт боппуруоһа сытыытык турда.
Тыа хаһаайыстыбатын улууһа буоларбыт быһыытынан бу салааҕа элбэх ыйытыы да, этинии да, туруорсуу да баар. Холобур, сааскы, күһүҥҥү өртөөһүн тула элбэх ыйытыыны биэрдилэр. Ону сэргэ билигин улууска ыытылла турар сүөһүнү, сылгыны чиптээһин туһунан сурастылар. Манна эмиэ үлэ былаан быһыытынан бара турарын, ону сэргэ хас биирдии сүөһүлээх киһи бэтэринээринэй сулууспа ыытар дьаһалын сөпкө өйдөөн утары баралларыгар баһылыктар эттилэр.
Кэлэр сылга киэҥ далааһыннаах тэрээһиннэри – Кыайыы 80, С.А.Зверев-Кыыл Уолун 125 сыллаах үбүлүөйдэрин үрдүк таһымнаахтык ыытарга бары турунан кыттыһыаҕыҥ диэн хас биирдии нэһилиэккэ этиннилэр. Бары нэһилиэктэр СВО кыттыылаахтарыгар уонна кинилэр дьиэ кэргэттэригэр көмөнү оҥоро олороллор. Ону сэргэ нэһилиэнньэ быйыл улууспут баһылыга анал дьаһалынан Аҕам саастаахтарга ытыктабыл сыла биллэриллэн, нэһилиэктэргэ биллэр көмө, тэрээһин оҥоһуллубуттан астыналларын эттилэр.
Оттон улуус дьаһалтатын отчуота тохсунньу ортотуттан саҕаланара былааннанар.
Яина ВЛАСЬЕВА
