Бүгүн, тохсунньу 15 күнүгэр, улуус баһылыгын социальнай боппуруостарга уонна имиджевэй бэлиитикэҕэ солбуйааччы Альберт Иванов салайааччылаах 4-с бөлөх, улуус дьаһалтатын 2024 сыллааҕы үлэтин отчуотун Хадан, Туойдаах, Кэмпэндээйи нэһилиэктэригэр сылдьан иһитиннэрдэ.
Хадан олохтоохторо саҥа оскуола-уһуйаан тутуутун, анал байыаннай дьайыы кыттыылаахтарын дьиэлэригэр киин ититии ситимин киллэрэри, эдэр исписэлиистэргэ анаан элбэх кыбартыыралаах дьиэ тутуутун, уот баҕаналара олус эргэрбиттэринэн сибээстээн саҥа баҕаналары туруорарга, кыайыы 80 сылыгар сөп түбэһиннэрэн, сэрии ыар кэмнэригэр Хадан сиригэр аас-туор олохтон хоргуйан өлбүттэргэ анаан өйдөбүнньүк бэлиэни туруорары, нэһилиэккэ кырдьаҕастар дьиэлэрин арыйары туруорсаллар. Маны сэргэ, саҥа тутуллан үлэҕэ киирбит спорт саалаҕа элбэх спортивнай инвентарь уонна тустарга анаан көбүөр наадатын эттилэр. Тыа хаһаайыстыбатын салаатыгар полономочие улууска бэриллээһинин, итиэннэ ынах-сүөһү, сылгы маркировкатын туһунан ыйыттылар. Ону тэҥэ, тиийинэн олоруу алын кээмэйин нэһилиэк дьонугар быһааран сырдаталларыгар эттилэр. Мунньахха 42 киһи кыттыыны ылла уонна улуус дьаһалтатын үлэтин биһирээтилэр.
Туойдаах нэһилиэгэр уопсайа 36 киһи кыттыыны ылла. Олохтоох дьону ордук саҥа оскуола-уһуйаан дьиэтин тутааһына, сайыҥҥы кэмҥэ өрүһүнэн сылдьарга уу мотуорун туруорусуута долгутар. Итини сэргэ, хат дьахтар доруобуйатын туруга үчүгэй буоллаҕынан куоракка баран төрүүрүн соччо сэҥээрбэттэрин биллэрдилэр. Хаарбах дьиэттэн дьону көһөрүү, социальнай дьиэ тутуутун, үлэ миэстэтин, пенсия ыстааһын ааҕыллыытын, пенсия үрдээһинин туһунан ыйытыылары биэрдилэр. Баҕаналары өрөмүөннүүр кэмҥэ уот арахсыыта хайдах буолуой диэн мунаахсыйаллар. Күн-түүн уматык сыаната тоҕо үрдүү турарын, Сунтаар улууһугар эбии АЗС наадатын туһунан боппуруостары эмиэ хаарыйдылар. Туойдаахха элбэх ыччат баарын бэлиэтээн, нэһилиэк инники кэскиллээҕин этиннилэр. Түмүккэ, араас хайысхалаах боппуруостарга хоруй ылан нэһилиэк дьоно эрэл кыымнаах тарҕастылар.
Кэмпэндээйи нэһилиэгин дьоно-сэргэтэ оскуола тутуутун, анал байыаннай дьайыыга сылдьар байыастар төрөппүттэрин дьиэлэригэр киин ититии ситимин киллэрэри, хочуолунай тутуутун, сирин быһаарыытын туһунан онтон да атын хайысхалаах боппуруостары туруорсаллар. Маны тэҥэ, нэһилиэк олохтоохторо булт, сааҕа көҥүл, саҥа сокуоннар туһунан кэпсии, сырдата тахсаллара буоллар диэн баҕа санаалаахтар. Улуус дьаһалтатын 2024 сыллааҕы үлэтин отчуотун 50 киһи кэлэн иһиттэ. Баһыйар өттө биһирииллэрин биллэрдэ.
Елизавета ТИТОВА