Улуус баһылыга Анатолий Григорьев граныгар социальнай бырайыактары көрүү-истии тэрээһинэ оскуола үөрэнээччилэригэр, итиэннэ ыччакка туһаайыллан сылын ахсын ыытыллар.
Тэрээһини ыччат бэлиитикэтин салалтата сүрүннүүр. Ол курдук, күн бэҕэһээ ыччат дьиэтин аактабай саалатыгар уопсайа 19 үлэни көрдүлэр. Олор истэригэр үөрэх тэрилтэлэриттэн 12 уонна эдэр ыччаттартан 7 социальнай бырайыак үлэтэ көмүскэннэ. Улахан бырайыак олоххо киирэригэр аҥардас соҕотох киһи толкуйуттан тахсыбат. Манна хас биирдии уһуйааччы сүбэтэ, көрүүтэ уонна ситимнээх үлэ баар эрэ буоллаҕына ордук көдьүүстээх бырайыак үөскүүр.
Ураты, сонун көрүүлээх бырайыактары дьүүллүүр сүбэ бэлиэтии көрөн, сөпкө сыаналаан кыайыылаахтары таһаардылар. Ол курдук, оскуола оҕолоругар 1миэстэни В.Г. Акимов аатынан Бүлүчээн лицей-интэринээт үөрэнээччитэ Александр Федоров «Изготовление керамических сувениров из природной глины местности Мэйик с.Хордогой Сунтарского улуса» бырайыагынан кыайыылаах тахсан 30000 солкуобайынан, 2 миэстэҕэ Л.Попов аатынан Арыылаах орто оскуолатын үөрэнээччитэ Юлия Егорова «Мы гордимся и помним…» Арассыыйа уонна ДНР дьоруойа Дмитрий Егоров 50 сылыгар анаан суруйбут үлэтинэн 25000 солкуобайынан, 3 миэстэҕэ Б. Игнатьев аатын сүгэр Дьаархан орто оскуолатыттан Кэскил Иванов, Алгыс Потапов, Вадим Пахомов «Гори как звезда-зажигай других» бырайыактарынан 20000 солкуобайынан наҕараадаланнылар.
Ыччаттар ортолоругар, 1 миэстэҕэ Дьаархан нэһилиэгиттэн Анна Маркова, Станислав Гольдеров «Наслег в формате ЗОЖ» 30000 солк., 2 миэстэҕэ Тойбохойтон Виктор Сметанин, Николай Егоров «Бэргэн охчут» 25000 солк., 3 миэстэҕэ «СунАМП» Семен Васильев «Учитель по обмену» 20000 солк. тигистилэр.
Бу курдук, бастыҥтан бастыҥ бырайыактар олоххо киирэллэригэр улуус баһылыгын грана саҥа саҕалааһыҥҥа көмө-тирэх буолуо диэн бигэ эрэнэбит.
Елизавета ТИТОВА