“Азия оҕолоро” VIII аан дойдутааҕы успуорт оонньууларыгар Сунтаар улууһун Элгээйи нэһилиэгин ыччата, ким волонтерунан, ким дьаһайааччы-контролерунан (контролер-распорядитель), күүс-көмө буола сылдьаллар.
Бүгүн биһиги кинилэри сорохторун, үлэлэрин быыһыгар таба тутан, бириэмэ аттаран кылгастык үлэ-хамнас, оонньуу туһунан санааларын үллэстэллэригэр көрдөстүбүт.
Диана-Сахая Яковлева, ХИФУ, психология институтун 3 кууруһун устудьуона, распорядитель-контролер:
— «Азия оҕолоро» оонньууга ааспыт сыл күһүнүттэн бэлэмнэнэн араас тэрээһиҥҥэ кыттан саҕалаабыппыт. Муус устар, ыам ыйдарыгар анал үөрэҕи ааспыппыт. Волонтер диэн буолбакка, «контролер-распорядитель» диэммит. Бэс ыйын 15-24 күннэригэр генеральнай репетицияны, бэлэмнэниини ааспыппыт. Үлэлиир сирдэрбит — постарбыт, хас да сиринэн бааллар, күн аайы уларыйан иһэр. Ханна баҕарар үлэлиэхпитин сөп. Сарсыарда 9 чаастан күрэх буолар сиригэр бу күрэх бүтүөр диэри үлэлиибит. Мин бэйэм «Модуҥҥа» үлэлээбитим. Биһиги үлэбит диэн киирэр дьону металлоискателинэн бэрэбиэркэлээһин, бобуллар сээкэйи илдьэ киирбэттэрин хонтуруоллааһын. Барытын интроскоп нөҥүө аһардабыт. Уопсайынан этэр буоллахха, контролер эбээһинэһэ киирэр ааҥҥа кэлэр дьону бэрэбиэркэлээһин, малларын-салларын көрөн аһардыы, дьону кытта алтыһыы буолар. Бэйэм «Азия оҕолоро» оонньуу аһыллыытыгар киин киирии ааҥҥа үлэлээбитим, стадиоҥҥа киирбэтэҕим. Билигин күннэтэ ити курдук күрэхтэһиилэр буолар сирдэригэр куорат устун тарҕанан үлэлиибит. Саха сиригэр «Контролер-распорядитель» диэн дастабырыанньалаах бастакылар буолабыт. ФСБ-лары, МВД-лары, полициялары кытта бииргэ үлэлиибит. Маннык дастабырыанньалаах эрэ буоллахха дьону кытта үлэлииргэ көҥүл бэриллэр. Генеральнай дириэктэрбит Николай Дьячковскай барыбытын — 300-чэкэ оҕону — иилээн-саҕалаан олус үчүгэйдик салайан илдьэ сылдьар.
Бу оонньууларга үлэлии сылдьан элбэх саҥа дьону кытта билсистим. Араас омук сириттэн кэлбит оҕолору кытта базовай английскай тылынан алтыһабыт. Олус үөрэллэр, кэпсэтэллэр, өйдөһөбүт. Оонньуу олус бэркэ ааһан эрэр. Оонньууну үөрүүлээхтик сабыы от ыйын 7 күнүгэр буолар. Онно эмиэ күүстээх үлэ күүтэр.
Сима Иванов, Элгээйи орто оскуолатын үөрэнээччитэ, волонтер:
— Саҥа тутуллубут ДЮСШ-9 успуорт комплексыгар волонтердуу сылдьабын. «Азия оҕолоругар» волонтердуурга Саҥа дьыл иннинэ сайтынан суруттарбытым. Икки нэдиэлэ анал үөрэтиини аастыбыт уонна бу волонтердуу сылдьабыт.
Бүгүн волейболга кыргыттар отделениеларыгар үлэлиибин. Уолаттартан соҕотохпун (күлэр).
Волонтердарга формабытын, кроссовкатыгар тиийэ, босхо биэрдилэр. Манна кэлэн элбэх оҕону кытта билсистим. Куораты биллим, холкутук барарга-кэлэргэ үөрэнним диэххэ сөп. Эһиил оскуолабын бүтэрэбин. Онон бу үлэм саҥаны көрөргө-билэргэ үчүгэй уопут буолар.
Альбина Иванова, Дьокуускайдааҕы С.Ф. Гоголев аатынан педагогическай колледж быйылгы выпускнига, волонтер:
— Сунтаар улууһун Элгээйи нэһилиэгиттэн сылдьабын. VIII «Азия оҕолоро» оонньуу волонтерабын. Үлэм хайысхата — култуурунай бырагыраама. Ону таһынан Оонньууну аһыы уонна сабыы үөрүүлээх тэрээһиннэригэр, реквизиттэргэ волонтердуубун.
«Азия оҕолоро» оонньуу миэхэ дьоһун суолталаах. Өссө 2016 с. ыытыллыбыт Оонньууга бастакытын кыттан турабын, аһыллыытыгар үҥкүүлээбитим. Маннык таһымнаах тэрээһин сорҕото буолар дьолломмутум.
Олус элбэх оонньуу кыттыылаахтарын, волонтердары кытта билсиспитим. 2016 с. Оонньуу үтүө өйдөбүллэри хаалларбыта. Быйыл «Азия оҕолорун» уота төрүт дойдутугар төннөр диэни эрдэттэн билэр этим, инньэ гынан волонтердууру эрдэттэн былаанныы сылдьыбытым. Волонтердааһын диэн киһи ис баҕа санаатыттан толорор үлэтэ буолар. Тэрээһин үөрүүлээх аһыллыыта буолан ааста. Аны Оонньуу сабыллыыта буолуо. Онно сүүрэ-көтө сылдьабыт. Бэйэм култуураҕа сыһыаннаах буоламмын, култуура хайысхатын талбытым. Онно тим лидеринэн (хамаанда лидерэ) оҥорбуттара. Үөрэхпин бүтэрэр, дипломнайдаах буоламмын аккаастаммытым. Мин санаабар, волонтер тугу барытын сатыахтаах, хайа баҕарар боппуруоска, хайысхаҕа быһаарсар буолуохтаах. Култуура буоллун, медицина хайысхата буоллун, тырааныспар, о.д а. өттө буоллун. Аһыллыы тэрээһинин кэмигэр волонтердуу сылдьан оннук санааҕа кэллим. Волонтер үлэтин олус сөбүлээтим. Хас даҕаны билэр дьонум волонтердуу сылдьаллар эбит. Биир улахан тэрээһиҥҥэ кыттыым бэйэбэр история курдук хаалара үчүгэй дии саныыбын.
Анна ИВАНОВА,
Марфа ИВАНОВА.