Сунтаар сэлиэнньэтигэр сүүрэр маршрутнай автобустар сырыылара олунньу 26 күнүттэн тохтоон турар. Ити бэйэ тиэхиньикэтэ суох, сатыы сылдьааччы дьоҥҥо кыһалҕаны үөскэттэ. “Автобус сырыыта хаһан сөргүтүллүөй?” — диэн ааҕааччыларбыт ыйытыыларыгар Сунтаардааҕы МАУ “АТП” тэрилтэ дириэктэрэ Элина Яковлева маннык хоруйдаата:
“Ространснадзор бэрэбиэркэ ыытарынан сибээстээн, автобустар сырыылара быстах кэмҥэ тохтотулунна. Сүрүн биричиинэтэ, тырааныспары оҥорор собуокка туруоруллубут ГЛОНАСС навигационнай систиэмэ РФ бырабыыталыстыбатын 2216 №-дээх уурааҕын ирдэбилигэр сөп түбэспэтэ итиэннэ пассажирдары страховкалааһын, маршрут картатын бигэргэтээһинэ уонна тиэйии-таһыы лицензиятын уһатыыга эмиэ кэккэ кэһиилэр тахсыбыттарын түмүгэ буолар. Онон, сырыы чопчу хаһан сөргүтүллүө биллибэт. Билигин ити итэҕэстэри туоратыыга, докумуоннары, тиэхиньикэлэри ирдэбилгэ эппиэттиир гына бэрээдэктээһин үлэтэ бара турар».
Елизавета ТИТОВА