Сунтаар улууһугар куруутун үтүɵ дьыала өрө тутуллар. Бу күннэргэ Дьокуускай куораттан олус улахан харыйа — бэлэх Дьаархан нэһилиэгэр олорор оҕолорго кэллэ.
Дьаархаҥҥа алыптаах түгэн! Куораттан саллаат ийэтэ, анал байыаннай дьайыы кыттыылаахтарын дьиэ кэргэттэрин кытта үлэлэһэр кэмитиэт салайааччыта Светлана Диодорова-Лаврентьева уонна ини-бии Николай, Прокопий Павловтар анал байыаннай дьайыыга аҕаларын сүтэрбит Артем, Эрхаан Потаповтарга улахан харыйа бэлэх ыыппыттарын илдьэн биэрдибит. Дьиэҕэ киирбиппит Артем эбэтинээн баар, ийэтэ уонна инитэ Эрхан куоракка сылдьаллар эбит. Уолчаан олус соһуйда, эҕэрдэ анабыл суругу дорҕоонноохтук ааҕан иһитиннэрдэ.
Светлана Диодорова-Лаврентьева кырачаан уолаттар аҕалара суох хаалбыттарын эбэлэриттэн истэн, кинилэргэ кыра да үɵрүүнү бэлэхтиир сыаллаах үтүɵ дьыаланы оҥордо. Бу үтүө хамсааһыҥҥа «Ёлки иголки» хаһаайыттара Николай, Прокопий Потаповтар көмө буолан маҕаһыыннарын саамай улахан харыйатын уонна биир толору дьааһык харыйа оонньуурун, уотун-күөһүн суулаан ыыппыттар.
Потаповтар бу күннэргэ саҥа дьиэҕэ киирээри үтүө түбүккэ сылдьаллар. Ону истээт, күɵх харыйаны онно туруоруохха дэһистибит. Харыйаны илдьиспит суоппар Андрей Соловьев түргэн-тарҕан хамсаныынан лаглайбыт күөх харыйаны сабыс саҥа дьиэ саалатыгар туруора охсон кэбистэ. Хата, дьиэлээхтэр куораттан кэллэхтэринэ улахан үɵрүү буолуоҕа. Артем мантан киэһэ өссө киэргэтиэм диэн тиуран махталын үтүө санаалаах дьоҥҥо тириэрдэр.
Тускулаана ГОРОХОВА-КОБЕЛЬЯНОВА