Сунтаарга күһүммүт бүппэт ардаҕынан элбэх киһини салыннарда, кыстыкка бэлэмнэнэр түбүктээх кэммитигэр харгыстары таһаарда. Ардах хаһан тохтуоҕай? Бастакы хаары хаһан күүтэбит? Улахан тоҥоруулар хаһан түһүөхтэрэй? диэн ыйытыктаах күнү-дьылы кэтээн көрөр Дьокуускайдааҕы гидрометеокиин метео, агро прогнозтары оҥорор салаа начальнигын Саргылана Никитинаны кытта сибээскэ тахсан кэпсэттибит: “Бу дьыл 10 күнүгэр диэри арҕааттан Красноярскай кыраайтан кэлэр циклон тохтуур санаата суох. Ол эрэн, сүрүн ардахтаах кэм ааста. Үксүн бу күннэргэ былыттаах халлаан, кыра инчэҕэй хаар уонна самыыр күүтүллэр. Түүнүн сылаас, тоҥоруу суох. Алтынньы 10 күнүгэр диэри биир эмит күн ыраас былыта суох халлаан туруон сөп. Бүгүн уонна субуотаҕа силбиктээх күн туруоҕа. Арай бу нэдиэлэҕэ өрөбүл күн баскыһыанньаҕа былыттаах ардаҕа суох күн буолуоҕа. Былыта суох күҥҥэ тоҥоруу түһүөҕэ. Онтон алтынньы 10 күнүттэн саҕалаан хаары күүтэбит”.
Маннык ардахтаах дьыл 2021 с. турбута диэн күнү-дылы кэтээн көрөр аҕам саастаах дьоммут этэллэр. Сунтаар нэһилиэгин олохтооҕо Владимир Петров уруккуттан халлаан туругун сурунар, сылыктааһын оҥорор идэлээх. Ол курдук, кини этэринэн арадахтаах күһүн- кэлэр сайын өлгөм үүнүүлээх өҥ дьыл бэлиэтэ буолар диэн этэр: “Сир дойду инчэйдэ, онтон тымныылар түстэхтэринэ уу ханна да барбакка сиргэ тоҥон хаалыаҕа. Оччоҕо саас уу элбэх буолуоҕа. Биллэн турар, сир иҥэриммит уута элбэх хаардааҕар быдан иҥэмтиэлээх буолар. Кэлэр сайын окко-маска, сир аһыгар өҥ дьылы күүтэбит. Кыһыммыт хойутаабакка кэлиэҕэ. Алтынньы ый ортотуттан кыстык хаар түһэрин күүтэбит. Өр сыллаах кэтээһимминэн көрдөххө Сунтаар кыһына сылаас буолуоҕа”.
Мира АФАНАСЬЕВА