Бүгүн эбиэт кэннэ улуус дьаһалтатын мунньахтыыр саалатыгар бу дьыл алтынньы 11-20 күннэригэр Удмуртия Өрөспүүбүлүкэтин Ижевскэй куоратыгар 17-лэригэр диэри саастаах уолаттар уонна кыргыттар ортолоругар буулдьанан ытыыга Арассыыйаҕа бастыыр иһин күрэххэ уоллаах кыыс пааранан бэстэлиэтинэн ытыыларыгар III-с миэстэ буолан, анал дипломунан наҕараадаламмыт биир дойдулаахпытын, А.П.Павлов аатынан 1 №-дээх орто оскуола 9-с кылааһын үөрэнээччитэ Виктория Ераскумованы чиэстээһин буолла.
Киирии тылы улуус баһылыгын социальнай уонна имиджевэй бэлиитикэҕэ солбуйааччы Гаврил Еремеев эттэ. Бастатан туран, кини Викторияны буулдьанан ытыы курдук успуорт биир кытаанах көрүҥэр эрчийэн, уһуйан үрдүк ситиһиилэргэ сирдээбиттэрин, өйөөбүттэрин, кынат буолбуттарын иһин тириэньэрдэригэр итиитик-истиҥник махтанна. Манна диэн эттэххэ, кыыс бастакы тириэньэрэ Светлана Николаева. Билигин Викторияны Александр Николаев эрчийэр эбит.
Бары да көрө-билэ сылдьаргыт курдук, 1 №-дээх орто оскуола ойоҕоһугар саҥаттан тутуллубут тиир турар. Виктория уонна кини бииргэ төрөөбүт эдьиийэ, эмиэ буулдьанан ытыынан утумнаан дьарыктанар, Дайаана манна эрчиллэллэр.
Күүстээх эрчиллии түмүгэр Виктория улахан таһымнаах күрэхтэһиилэргэ ситиһиитэ үгүс. Ол курдук, кини успуорт бу көрүҥэр 1-кы разрядтаах. СӨ сүүмэрдэммит хамаандатын чилиэнэ. 2022 с. ахсынньытыгар Улан-Удэ куоракка буолбут Уһук Илин Федеральнай уокурук күрэҕэр уоллаах кыыс пааранан ытыыларыгар I-кы, 2023 с. олунньутугар Ижевскэй куоракка буолбут күрэххэ пааранан ытыыга II-с, муус устарга СӨ бастыыр иһин күрэҕэр личкаҕа I-кы, паараҕа — II-с м., о.д.а. күрэхтэргэ миэстэлэспит. Бу сэтинньигэ эмиэ күрэхтэһэ бараары эрчиллэ сылдьар.
Ижевскэйгэ буолбут күрэххэ барыта 109 паара кыттыбытыттан биһиги кыыспыт III-с бочуоттаах м. буолбутун киэн тутта тириэньэрэ Александр Николаев эттэ. Өссө кини күрэхтэһэр сирдэригэр «биһиги Дьоруой буолбут саха буойуттарбытын билэллэр» диэн киэн тутта кэпсээтэ. Биһиги оҕолорбут Арассыыйа күүстээхтэрин кытта тэҥҥэ киирсиэхтэрин сөбүн туһунан бэйэтин кэтээн көрүүтүн эттэ.
Викторияны эҕэрдэлээбит дьон киниэхэ инникитин өссө үрдүк ситиһиилэри баҕардылар. Ыарахаттартан чаҕыйбатыгар сүбэлээтилэр. Хас да киһи кыыс төрөппүттэригэр махталын эттэ. Кинилэр өйөөн кыыстара бачча ситиһиилэммитин туһунан эттилэр.
Манна диэн эттэххэ, аҕа-балыс Ераскумовалар буулдьанан ытыынан 3-с сылын утумнаахтык дьарыктаналлар. Дайаана успуорт бу көрүҥэр успуорт маастарыгар кандидат.
Тэрээһин түмүгэр Виктория бииргэ төрөөбүт эдьиийэ Дайааналыын хомуска оонньоон, кэлбит дьон сүргэлэрин көтөхтүлэр. Кырдьык этэллэр эбит, «Талааннаах киһи барытыгар талааннаах» диэн.
Виктория тириэньэрэ Александр Николаевтыын
Виктория уонна Дайаана Ераскумовалар хомуска оонньууллар
Гаврил АНДРЕЕВ