Өссө биир сылбыт түмүктэниэ аҕыйах хонук хаалла. Араас хайысхаҕа, үлэҕэ ааһан эрэр сыл түмүктэрин таһаарыы, ырытыһыы кэмэ.
Бүгүн, ахсынньы 23 күнүгэр «Өбүгэ ситимэ» Саха сирин норуот эмчиттэрин ассоциацията Майа нэһилиэгэр бэйэтин чилиэннэрин түмэн, сылы түмүктүүр тэрээһинэ үөрүүлээх-быһыыга майгыга тэрилиннэ.
Саха дьоно-сэргэтэ былыргыттан ийэ айылҕаҕа чугас, ураты норуот. Билигин тэтимнээхтик сайдар олохпутугар, араас омук итэҕэлэ, үөрэҕэ балысханнык киирэр-тахсар кэмигэр айылҕаттан айдарыылаах дьон өбүгэлэриттэн сиэттэрэн арыллан, сиэр-майгы сатарыйыытын утары үгүс үлэни ыыталлар. Төрөөбүт ийэ тылтан саҕалаан сүдү суолталаах эйгэнэн этитэр үлэлэргэ ылсаллар. Бу ылбычча киһи дэбигис өйдөөбөт чараас, ураты көстүбэт айдарыылаахтар эйгэлэрин киһи мээнэ ылан ыһа-тоҕо кэпсээбэт. Ааһан эрэр сылга ассоциация чилиэннэрэ иллээх-эйэлээх олоҕу түстээһиҥҥэ, байыаннай дьайыыга сылдьааччыларга эмтээх үүнээйилэртэн маас, эмп-томп оҥорон, алгыс тыллаах илдьиттэри оҥорон ыыталлар. Бу бары бэйэлэрэ сүрүн үлэлээх, тэрилтэлээх дьон анаммыт айылҕаларынан тулалыыр эйгэҕэ, кыһалҕалаах дьону кытта, ону сэргэ сиэр-майгы киэҥ өйдөбүлүн тула нэһилиэнньэҕэ сылдьалларын тухары үлэлииллэр.
Күн-бүгүн 75 киһилээх ассоциацияны айылҕаттан айдарыылаах кэргэннии Одун Элиэнэ Егоровна-Куорсуннаах уонна Айылхан Болуодьа уола салайаллар.
Сыл түмүктэрин таһаарар тэрээһиҥҥэ быйыл хотунан-соҕуруунан үгүс үлэ ыытыллыбыта иһитиннэрилиннэ. Ону тэҥэ бу күн Үөһээ Дьааҥыттан, Өлөөнтөн, Амматтан, Уус Алдантан, Сунтаартан, о.д.а улуустартан кэлбит түмсүү кыттыылаахтарыгар махтал суруктары сэргэ анал ааттар туттарылыннылар. Ол курдук, «СЫЛ БАСТЫҤ ЭМЧИТЭ» ааты — Андрей Игнатьев, Людмила, Степан Ивановтар, Александра Габышева туттулар. Оттон «СЫЛ БАСТЫҤА» анал аат хаһаайыннарынан буоллулар — Прасковья Афанасьева, Денис Оконешников, Лука Апросимов, Елена Егорова, Наталья Васильева, Урсууна Федорова, Юлия-Айархаана Алексеева.
Махтал суруктарынан бэлиэтэннилэр — Маргарита Лазарева, Октябрина Гоголева, Татьяна Алексеева, Зоя Герасимова, Евдокия Сидорова.
Ураты эйгэ үөрүүлээх тэрээһинигэр дьоһуннаах үлэҕэ сылдьааччылары оҕо сааска төнүннэрэн Тымныы оҕонньор минньигэс кэһиилэрин туттартаата. Үөрүү-көтүү аргыстаах тэрээһининэн түмүктэнэн хаалбакка, ыраахтан кэлбит ыалдьыттар Хара нэһилиэгэр уһуйааччы Одун Элиэнэ Егоровна балаҕаныгар үөрэх-билии эбинэн тарҕастылар.
Юлия ЕГОРОВА