Аныгы кэмҥэ хайа баҕарар үөрүүлээх бэлиэ түгэни олус кэрэтик киэргэтиллибит фотозонаҕа хаартыскаҕа хатыыр үтүө үгэс буолла. Саҥа дьыл алыптаах кэмигэр киэргэнэн-симэнэн дьиэ кэргэнинэн, дьүөгэлэрдиин, доҕоттордуун хаартыскаҕа түһэр сүппэт үтүө өйдөбүл буолара саарбаҕа суох. Оттон Сунтаарбытыгар өҥү-дьүһүнү олус сөпкө дьүөрэлээн көрүөхтэн кэрэ бэйэлээх эйгэ @viktoria.fotozona.sun диэн тэриллэн үлэлиир.
Бу фотозонаны ураты көрүүлээх, илиилэригэр дьоҕурдаах үс кэрэ аҥаар — Лидия Степанова, Анастасия Тарасова, Диана Иванова бэлэмнээн оҥорбуттар. 4 араас — улахан да, кыра да оҕоҕо сөп түбэһэр муннуктар олус тупсаҕайдык киэргэтиллибиттэр. Бастакы зона сэбиэскэй кэминээҕи ыскаапка табыгастаахтык оҕоҕо анаан оҥоһуллубут. Дыргыл сыттаах нобилис лабаалаах уонна дьэрэкээн харыйа оонньуурдардаах муннукка араастык туттан-хаптан түһүөххэ сөп. Саамай истиҥ эйгэни көрдөрөр кыраһыабай иһиттээх-хомуостаах саҥа дьыллааҕы остуол муннуга. Онтон баархат сабыылаах уонна быйылгы Саҥа дьыл киэргэтиитин муодата — улахан баанчыктаах муннуктарга алыптаах кэми кэрэһэлиир бэртээхэй хаартыскалар буолуохтара. Биир түгэҥҥэ 4 араас миэстэҕэ түһэн дьоллоох кэмҥитин үйэтитиҥ.
Алена ИВАНОВА