Кириэстээх нэһилиэгин олохтоохторуттан анал байыаннай дьайыыга сылдьар байыастарга көмөлөһүү тиһигин быспакка салҕанан бара турар.
Бу күннэргэ Августина Платонова көҕүлээһининэн уонна салайыытынан 3×3 уонна 5×2 кээмэйдээх хаххалыыр сиэккэлэри «Саргы түһүлгэтэ» КК кэлэктиибэ (сал. Альбина Платонова), «Кустук» түмсүү (сал. Любовь Павлова), «Сайдыына» түмсүү (сал. Любовь Попова), «Утум» түмсүү (сал. Лилия Игнатьева), нэһилиэк олохтоохторо Полина Трифонова, Василиса Дарвидонова, Саргылана Григорьева, Галина Сортолова, Сардана Данилова, Евдокия Никитина уо.д.а. үс күн өрөн бүтэрдилэр.
Сиэккэ өрөргө анаан 2 станогу оскуола үлэһиттэрэ – дириэктэр Евгений Тараяров, завхоз Эдуард Дарвидонов оҥорон биэрбиттэрэ. Нэһилиэк тэрилтэлэрэ сиэккэ баайар таҥаһын кырыйан, бэлэмнээн көмө буоллулар.
Ону таһынан биир дойдулаахтарбытыгар Геннадий Ивановка уонна Константин Яковлевка баһыылка оҥоһулунна. «Харыстас» түмсүү (сал. Надежда Егорова) тикпит халыҥ көстүүмнэрин, таҥастарын, нэһилиэк олохтоохторо аҕалбыт таҥастарын-саптарын, астарын-үөллэрин нэһилиэк баһылыга Александр Григорьев Мииринэй куоракка анал байыаннай дьайыы кыттыылаахтарын өйүүр туһааннаах «Мы вместе» диэн уопсастыбаннай хамсааһын пуунугар илдьэн туттарда.
Дойдубутун көмүскүү сылдьар хорсун-хоодуот уолаттарбытыгар көмөлөһөр санааттан кыһаллан, сэмэй кылааппытын киллэрсэргэ бүтүн нэһилиэгинэн кыралыын, улаханныын туора туран хаалбакка ылсан үлэлэстибит. Нэһилиэкпит бары олохтоохторугар, тэрилтэлэрбит салайааччыларыгар, кэлэктииптэргэ, уопсастыбаннай түмсүүлэргэ, ытык-мааны кырдьаҕастарбытыгар дириҥ махталбытын тириэрдэбит.
Сусанна ПОТАПОВА