Бэҕэһээ, тохсунньу 26 күнүгэр, Маар Күөл орто оскуолатыгар улуустааҕы «Малокомплектнай оскуола бастыҥ алын сүһүөх учуутала — 2024» куоҥкурус буолан ааста. Манна улуус араас оскуолатыттан 6 учуутал кытынна. Бэлиэтээн эттэххэ, бу күрэс 2014 сылтан бэһис төгүлүн ыытыллар.
Куоҥкурус саҕаланыытыгар учууталлар уһулуччулаах маастарыстыбаларын уонна идэтийиилэрин таһымын көрдөрөн, аһаҕас уруоктары ыыттылар.
Тэрээһин дьоро аһыллыытыгар үөрэх салалтатын аатыттан информационнай-методическай отдел сүрүннүүр исписэлииһэ Маргарита Попова кыттааччыларга ситиһиилэри баҕаран туран, эҕэрдэ тылы эттэ. Кыттааччылар педагогическай үлэ бэтэрээннэригэр бэлэх туттартаатылар.
Ол кэннэ учууталлар «медиавизитка» уонна «Айхал, сахам тылыгар!» диэн түһүмэхтэри аастылар. Манна тус ситиһиилэрин уонна талааннарын көрдөрөргө кыах бэрилиннэ. Тэрээһин хаамыытынан кыттааччылар интэриэһинэй маастар-кылаастары ыыттылар, онно мустубут дьон уопут атастаһан, саҥа ньымалары дьүүллэстилэр. Бу педагогтар билиилэрин кэҥэтэллэригэр, үөрүйэхтэрин тупсаралларыгар олус туһалаах ньыма буолар.
Куоҥкуруһу түмүктүүргэ Маар-Күөл нэһилиэгин баһылыга Сергей Саввинов эҕэрдэ тылын этэн туран, тэрийээччилэргэ махталын биллэрдэ.
Дьүүллүүр сүбэ быһаарыытынан 3-с истиэпэннээх лауреатынан Вера Ю (Толоон алын сүһүөх оскуолата), 2-с истиэпэннээх — Карина Григорьева (Кэппэндээйи политехническай орто оскуолата), 1-кы истиэпэннээх лауреат — Зоя Федорова (Түбэй орто оскуолата) буоллулар. Куоҥкурус муҥутуур кыайыылааҕа ааты Маар-Күөл орто оскуолатын учуутала Алена Степанова ылла. Учууталларга кинилэр туйгун үлэлэрин иһин хайҕал суруктар туттарылыннылар.
Бу куоҥкурус учууталлар профессиональнай карьераларгар умнуллубат түгэнинэн буолла.
Сунтаардааҕы үөрэҕирии управлениетын пресс-сулууспата.