Саҥа үөрэх дьыла саҕаланара аҕыйах күн хаалла. Быйыл үөрэх эйгэтигэр туох, ханнык уларыйыылар баалларын туһунан үөрэх управлениетын начальнига Альберт Ивановтуун кэпсэттибит.
«Ааспыт нэдиэлэҕэ Дьокуускайга атырдьах ыйынааҕы үөрэх эйгэтин үлэһиттэрин сүбэ мунньаҕа буолан ааста. Сунтаар улууһуттан 25 киһилээх дэлэгээссийэ кыттыыны ылан кэллибит. Сүбэ мунньах чэрчитинэн төгүрүк остуоллар, сэминээрдэр, стратегическай сиэссийэлэр, үөрэх интенсивтара, мастарыскыайдар о.д.а сылдьан көрдүбүт-иһиттибит. Пленарнай мунньахха Ил Дархан Айсен Николаев олус интэриэһинэй, сонун этиилэри киллэрдэ. Саамай сүрүнэ технологическай үөрэхтээһини сайыннарыыны тоһоҕолоон эттэ. Өрөспүүбүлүкэбитигэр бырамыысаланнас сайдыыта тэтимнээхтик барар. Манан сиэттэрэн физика уруогун биэрэр учууталлары бэлэмнээһиҥҥэ, бу биридимиэккэ улахан болҕомтону уурарга туһаайда. Ону тэҥэ сүбэ мунньах түмүгүнэн үлэ лааҕырдарын, сайыҥҥы сынньалаҥы уратытык ыытарга концепция ылылынна. Бу тэрээһин үөрүүлээх чааһыгар, биһиги ытыктыыр кэллиэгэбит Татьяна Жиркова өр сыллаах, сыралаах үлэтэ сыаналанан Ил Дархаммыт Айсен Николаевтан «Гражданскай килбиэн»бэлиэнэн наҕарааданы тутан долгутуулаах түгэн тосхойдо.
Үөрэхтээһин эйгэтигэр быйыл кэккэ уларыйыылар бааллар. Ол курдук, ОБЖ, технология биридимиэттэрин оннугар икки саҥа — “Основы безопасности и защиты Родины” (8-11 кыл.) уонна “Труд” (1-9 кыл.) диэн уруоктар киирдилэр. Оҕону үлэҕэ иитии урукку да өттүгэр баар этэ. Ол тохтуу быһыытыйан баран, хос сөргүтүллэн эрэр. Онон сүрүн болҕомтону үлэнэн иитиини күүһүрдүүгэ ууруохтаахпыт.
Сунтаарбыт улууһун үөрэнээччилэрин биир кэлим пуормалара быйыл эмиэ атыылана турар. Былырыыҥҥаттан биир кэлим концепция ылыллан улахан бырайыак үлэлээн саҕалаабыта. Санатан ааһар буоллахха, былырыын Матвей Евсеев көҕүлээһининэн байыаннай дьайыы кыттыылаахтарын оҕолоругар босхо оскуола пуорматын ылан биэртэлээбитэ. Оттон быйыл улууспут бүдьүөтүттэн үбүлэнэн бу үтүө дьыаланы салгыыбыт. Онон Сунтаарбыт улууһун оскуола пуорматын СВО бары кыттыылааҕын оҕолоругар босхо биэрэбит. Быйыл бастакы кылааска бүгүҥҥү күн туругунан 318 оҕо киирэрэ биллэр.
Үрдүк үөрэххэ киирээһин былырыыҥҥытааҕар көрдөрүүтэ үрдүк. Орто үөрэххэ киирии түмүгэ биллэ турар. 2024-2025 сс. үөрэх дьылын саҕалыырга бары үөрэх тэрилтэлэрэ оскуолалар, уһуйааннар эрдэттэн приемканы бары ааһан оҕолору көрсөргө, үлэлииргэ бэлэмнэр».
Алена ИВАНОВА