Бу сыл устата С.А. Зверев – Кыыл Уолун аатынан норуот айымньытын түмэлигэр Улуу Кыайыы 80 сылыгар аналлаах Сунтаар улууһун түмэллэрин ортолоругар “Историческая память о Великой Отечественной войне и преемственность подвигов земляков – участников ВОВ и СВО” быыстапка-куоҥкурус биллэриллэн ыытылла турар.
Бүгүн, Аллыҥатааҕы историко-этнографическэй кыраайы үөрэтэр оскуола түмэлэ бу быыстапка-куоҥкуруска анаан, Аҕа дойду Улуу сэриитин кэмигэр нэһилиэк олоҕо-дьаһаҕа, дьоно-сэргэтэ хайдах дьаһанан олорбуттарын, итиэннэ сэрии толоонугар кыргыспыт, олохторун толук уурбут, кыайыыны уһансыбыт уонна анал байыаннай дьайыыга сылдьар биир дойдулаахтарын тустарынан кэпсиир сэдэх хаартыскалары, ахтыылары, экспонаттары дьон көрүүтүгэр киллэрдэ. Кыраайы үөрэтэр оскуола түмэлэ 1990 с. тэриллэн күн бүгүнүгэр диэри олус таһаарыылаахтык үлэлии турар. Оттон бу түмэл төрүттээччитэ, тэрийээччитэ, хас биирдии матырыйаалын түмэн дьон билиитигэр тиэрдээччи киһинэн – Таисия Иванова буолар. Быыстапка арыллыытыгар Аллыҥа оскуолатын дириэктэри иитэр үлэҕэ солбуйааччы, экскурсовод Наталья Антонова кэпсээнин кэлбит ыалдьыттар олус диэн сэҥээрэн иһиттилэр.
“Бу быыстапка-куоҥкурус туһунан истэн, ыҥырыыларын быһа гыммакка, тута сөбүлэһэн кытта киирэ сылдьабыт. Манна анаан элбэх, араас Улуу Кыайыы 80 сылыгар аналлаах экспозицияны хомуйан түмтүбүт. Ону тэҥэ, саҥа истиэндэ оҥотторон киллэрдибит. Биһиги нэһилиэктэн анал байыаннай дьайыыга 11дьиэ кэргэнтэн дойдуну көмүскүүр байыас уолаттарбыт кыттыыны ыла сылдьаллар. Хас биирдиибит кинилэр тустарыгар олуһун долгуйабыт, этэҥҥэ эргиллэн кэлэллэрин күүтэбит”, – диэн Наталья Антонова үллэһиннэ.
Быыстапка бүгүҥҥү күнтэн саҕалаан муус устар 4 күнүгэр дылы дьон-сэргэ көрүүтүгэр туруо.
Елизавета ТИТОВА