Ахсынньы 16 күнүгэр Аллыҥа нэһилиэгэр бырааттыы Уаровтар ааттарынан спорт саалатыгар омукпут инники күөҥҥэ туруорар, киэн тутта ааттыыр мас тардыһыы- мас-рестлинг көрүҥэр федерация Кубогын бирииһигэр улуустааҕы комплекснай күрэхтэһии буолла. Манна уопсайа улуус 11 нэһилиэгиттэн мадьынылар кэлэннэр, бастыҥнар ааттарын былдьастылар, күүстээхтэр түһүлгэлэрин төрүттээтилэр. Күрэхтэһиини Сунтаар улууһун мас-рестлинг федерациятын бэрэссэдээтэлэ Гаврил Еремеев уонна масрестлинг сүрүн судьуйата Афанасий Сергеев ыыттылар. Нэһилиэктэрин аатын ааттатаары, кыайыы иһин киирсэннэр, сорох уопуттаах , сорох помоска саҥа тахсааччы даҕаны, сүрдээх тыҥааһыннаах, ыһыылаах-хаһыылаах киирсиилэри көрдөрдүлэр. Спорт саалатын салгына өрө көтөҕүллэн олордо, бэл диэтэр, нэһилиэктэрин аатыттан Дьокуускай куораттан кэлэннэр күүстээхтэр ахсааннарыгар кииристилэр.
Ол курдук үс бөлөххө маннык миэстэлэри ыллылар:
I м. Кутана, II м. Сиэйэ, III м. Тойбохой
I м. Аллыҥа, II м. Маар Күөл, III м. Бүлүчээн
I м. Түбэй, II м. Хадан, III м. Илимниир.
Үс бөлөххө бастаабыттар икки ардыларыгар федерация кубогын ылар иһин киирсиигэ , күүстээхтэр ааттарын ылбыт , бастыҥнар ааттарын биэрбэтэх Түбэй нэһилиэгин мадьынылара кыайдылар. Үрүҥ көмүс мэтээл хаһаайыттарынан кутаналар буоллулар. Боруонсаны ылары Аллыҥа нэһилиэгин мадьынылара ситистилэр.
Улуус күүстээхтэрин, мадьыныларын түһүлгэтэ тэриллэн, дойдуга бэриниинэн салайтарар хас кыттыыны ылбыт нэһилиэк олохтоохторун кыайыы иһин дьулуурдара көһүннэ, бастыҥнар ааттара манна, Аллыҥаҕа, ааттанна!
Надежда ИВАНОВА, Аллыҥа