Ил Дархан Айсен Николаев «Саха» НИКХ, «Якутия 24», «Россия 24» ханаалларыгар, «Тэтим», «Радио России», «Виктория Саха», «СТВ-радио» араадьыйаларыгар уонна Ил Дархан социальнай ситимнэригэр өрөспүүбүлүкэ олохтоохторун кытары быһа эпииргэ тахсан сайдыы, ыытыллыбыт үлэ-хамнас, Саха сирин сайдыытыгар стратегическай хайысхаларга бэйэтин санаатын үллэстэрэ, билиһиннэрэрэ үтүө үгэскэ кубулуйда.
Ол курдук, бүгүн эмиэ Өрөспүүбүлүкэбит күнүн көрсө маннык ньыманан дьонун-сэргэтин кытары кэпсэттэ. Олохтоохтор ыйытыыларыгар дириҥ ис хоһоонноох хоруй биэрдэ. Ыйытыылары билигин быһа эпиир кэмигэр салгыы ыла олороллор.
Сунтаар нэһилиэгин олохтооҕо Александр Федоров тыа хаһаайыстыбатыгар субсидия туһунан чуолкайдаста. Ол курдук, кини чуолаан үүккэ, ынахха бэриллэр харчы бу кэлиҥҥи кэмҥэ хойутаан түһэр буолла, бу харчы биһиэхэ тыа дьонугар суол хаайыан иннинэ хааччынан уматык, сайын окко киириэх иннинэ техникаларбытын өрөмүөннэрбитигэр саппаас чаас атыылаһарбытыгар, о.д.а. улахан көмө буолар диэн этэр. Маныаха Айсен Сергеевич тыа хаһаайыстыбатын салаатыгар — ынах төбөтүгэр, үүккэ көрүллэр субсидия аадырыстаах дьонугар кэмигэр түһүөхтээх диир. Үүккэ, ынах төбөтүгэр бэриллэн харчы түргэнник быһаарыллан иһэрин хонтуруолга тутулларын эттэ. Тыа хаһаайыстыбатын сайдыыта – тыа сирин олохтооҕо туруктаах буолуутун мэктиэтэ диэтэ.
Яина ВЛАСЬЕВА