«Радуга Севера» 27-с өрөспүүбүлүкэтээҕи үөрэнээччилэр айар үлэлэрин улуустааҕы түһүмэҕэр 24 хайысханан 160-ча үлэ киирдэ.
Тэрээһиҥҥэ Сунтаар улууһун уран уустарын түмсүүтүн салайааччыта Ксения Семенова, ыччат салаатын сүрүннүүр үлэһитэ Николай Лидочен, үөрэҕирии салалтатын эбии үөрэхтээһин уонна иитии салаатын сүрүннүүр үлэһитэ Анна Сидорова уонна оҕо дьоҕурун сайыннарар киин дириэктэрэ Ангелина Антонова бэйэлэрин эҕэрдэлэрин тириэртилэр.
Хас биирдии хайысханы дьүүллүүр сүбэ сыаналаата, бастыҥнары быһаарда. Үөрэнээччилэр үлэлэрин сэргэ «Уран Уус» диэн эбии үөрэхтээһин педагогтарын, технология учууталларын уран оҥоһуктарын быыстапката уонна Сунтаардааҕы оҕо дьоҕурун сайыннарар киин иһинэн үлэлиир «Үһүс көлүөнэ» оскуолатын кыттыылаахтарын 60-ча үлэлэрэ дьон болҕомтотун тартылар. Быыстапка саамай сэргэх уонна интэриэһинэй көстүүтүнэн саха быһаҕын тургутуу түһүмэҕэ буолла. Ол курдук оҕолор уонна уһуйааччылар охсубут быһахтарын кылаанын тургутан минньигэс тоҥ балыгы кыһан көрөөччүлэри күндүлээтилэр. Костя Никитин (лиссиэй үөрэнээччитэ) Василий Уаров (СДШИ преподавателэ) охсубут саха быһахтара кылаан кыайыылаах буоллулар.
Айна ЯКОВЛЕВА.
