Сунтаарбыт киинигэр «Ayar’ko» диэн иистэнэр уонна илиинэн оҥоһуктары оҥорор мастарыскыай биисинэс дьиэтин үһүс этээһигэр арыллан үлэтин саҕалаата. Мастарыскыайга үс илиилэригэр талба талааннаах кэрэ аҥаар сүбэлэрин холбоон 5 саастарыттан саҕалаан оҕолорго уонна улахан дьоҥҥо араас маастар кылааһы ыыталлар. Ньургуйаана Павлова сүрүн үлэтэ – алын кылаас оскуола остолобуойун сэбиэдиссэйэ. 2018 с. полимернай туойунан сөбүлээн дьарыктанар эбит. Илин кэбиһэрдэри, киэргэл кэмпилиэктэрин сакааска оҥорор. Дьарыктарыгар кини киэргэллэри, куруускалары, ньуоскалары киэргэтэргэ үөрэтэр.
Катя Павлова — иистэнньэҥ. 2022 сыл. социальнай хантыраак түһэрсэн иис хоһун арынан сакааска тигэр. Маастар кылааска кини пластиктан брелогу, бэлэм мас оҥоһуктары кыраасканан киэргэтиини оҥорторор. Ону тэҥэ, “Бииргэ иистэниэх”, “Иистэниэхпин баҕарабын” иис маҥнайгы сатабылларыгар уһуйар куурустары ыытар.
Оттон Наташа Ткаченко улуустааҕы үөрэҕирии салалтатыгар үлэлиир. Манна кини гиипсэнэн, оҕуруонан чокеры, ободогу, кольены, биһилэҕи, броһу, о.д.а. оҥорторор.
«Ааспыт нэдиэлэҕэ биэс күҥҥэ 9 оҕо дьарыктаммыта. Атырдьах ыйын 5-тэн -10-гар диэри алта маастар кылааһы ыытабыт. Оҕолору кытта алтыһыыттан, илии үлэтиттэн киһи дууһалыын сынньанар”, -диэн кыргыттар астына кэпсииллэр.
Уран тарбахтаах кэрэ аҥаардар инникитин саҥаны, сонуну киллэрэн маастар кылаастар хайысхаларын эбии кэҥэтэри былаанныыллар. Кыһынын эмиэ өрөбүл күннэргэ маннык дьарыктары ыытан, оҕолор каникулларын туһалаахтык атаарыахтара диэн күүтэбит.
Оҕону сайыннарар, сатабылы байытар дьарыктар бааллара кэрэхсэбиллээх.
Алена ИВАНОВА