С.А Зверев-Кыыл Уолун аатынан улуустааҕы норуот айымньытын киинигэр нэһилиэктэр икки ардыларыгар ыытыллар «Айан күрэх» улууспут талба талааннаахтарын күрэһэ саҕаланна.
«Айан күрэх» сэтинньи 27-29 күннэригэр кыра, орто, улахан нэһилиэктэр ортолоругар ыытыллар. Ол курдук, сэтинньи 27 күнүгэр Сунтаар улууһун кыра нэһилиэктэрин икки ардыларыгар ыытылынна.
Тэрээһиҥҥэ Илимниир, Күүкэй, Наахара, Түбэй, Тэҥкэ, Туойдаах, Толоон, Уустуйа, Хоро уонна Хадан нэһилиэктэр араас талааннаах дьоно кэлэн театральнай көрдөрүү, бөлөҕүнэн үҥкүү уонна ырыа хайысхаларыгар кытыннылар, ону таһынан илии оҥоһуктар быыстапката буолла.
Күрэх түмүктэрэ сылы сабар «Кылаан» Сунтаар култууратын бастыҥнарын чиэстиир тэрээһиҥҥэ биллиэҕэ.
Бу тэрээһинтэн киирбит үп Игнатьева Айталина Анатольевнаҕа Москва куоракка ыарахан ыарыыттан эмтэнэ барарыгар көмө буолар.
Бүгүн, С.А Зверев-Кыыл Уолун аатынан улуустааҕы норуот айымньытын киинигэр, 17:00 чааска, «Айан күрэх» улууспут орто нэһилиэктэрин ыккардыларыгар буолуоҕа.
Дмитрий ЫМЫЧАНОВ