Кэлэн иһэр саргылаах саҥа дьылы көрсө бүгүн «Аi-Tut-Onor» Сунтаар талба талааннаах кэрэ аҥардарын түмсүүтэ быыстапка-дьаарбаҥка тэрийэн ыытта. Айар-тутар илиилэригэр дьоҕурдаах кыргыттар баатанан куукулалары, гиипсэттэн оҥоһуктары, саҥа дьыллааҕы харыйа оонньуурдары, ытарҕалары, киэргэллэри, тортары, о.д.а. бэйэлэрин оҥоһуктарын атыылаатылар. Ураты тыыннаах, сиэдэрэй, киһи хараҕын тардар, дьэрэкээн көстүүлээх үлэлэр арааһа дэлэй.
Кэлбит дьон саҥа дьыл аптаах эйгэтигэр фотозонаҕа астына хаартыскаҕа хатаннылар. Ону тэҥэ Диана Туой-ДИ — «Баҕа санаа чүмэчитэ», Катерина Павлова «Айар-Куо» — «Мас харыйа оонньуурун кыраасканан киэргэтии», Мирослава Уарова «Сүүтүк» — уруһуй, гиипсэттэн үлэлэри кыраасканан киэргэтии маастар-кылаастарын ыыттылар.
Дьаарбаҥка тэрийээччилэрэ кыттыы иһин усунуостарынан «Үтүө санаа харыйата» аахсыйаҕа кыттыһан оҕолорго бэлэх оҥоруохтара.
Бу тэрээһин аны ахсынньы 21 күнүгэр «Партизан» кулуубугар ыытыллара былааннанар.
Чугас дьоҥҥутугар саҥа дьыллааҕы күндү бэлэҕи бу дьаарбаҥкаттан арааһы булуохха сөп.
Алена ИВАНОВА