Ахсынньы 22 күнүгэр Арассыыйаҕа энергетика үлэһиттэрин күнэ бэлиэтэнэр

Биһиги улууспутугар Сунтаардааҕы электростанция биир сүрүн, тыын боппуруоһу быһаарар тэрилтэ буолар. Уота суох олох суоҕун кэриэтэ. Улуус олохтоохторун олоҕо-дьаһаҕа, үлэтэ-хамнаһа хаамыыта атахтамматын туһугар бу тэрилтэ хас биирдии үлэһитэ бары күүһү-уоҕу, кыһамньыны ууран туран үлэлииллэр.
Сунтаар сэлиэнньэтигэр бастакы уот ситимин биэрии алтынньы 17 күнүгэр 1947 с. саҕаламмыта. Онтон 1972 с. тохсунньу 14 күнүгэр ГЭС уота бэриллибитэ.
Билигин РЭС 10 учаастактаах, ол иһигэр Элгээйи уонна Кириэстээх нэһилиэктэрэ киирэллэр. Күн бүгүн кэлэктиип барыта 121 үлэһиттээх. Улууспут 26 нэһилиэгин уотунан толору хааччыйан олорор. Былаан быһыытынан быстах уонна хапытаалынай өрөмүөннэрин сылын аайы кэмигэр ыытар. Ол курдук, быйыл барыта холбоон 248 опуора өрөмүөннэннэ, 6 га иэннээх уот линиятын солооһуна ырастанна, 17 км. усталаах боруобат СИП 2 уларытылынна, уопсайа уот ситимэ ВЛ-0,4-110 кВт линия оҥоһулунна. Уот барар ыксаллаах түгэнигэр саахалы туоратарга күнүстэри-түүннэри, ардаҕы, хаары аахсыбакка сыраларын-сылбаларын ууран үлэлииллэр. Түбүктээх үлэ быыһыгар тэрилтэ улуус уопсастыбанай олоҕор көхтөөхтүк кыттар.
Кыһын, тымныы түстэҕинэ уоту араараллар диэн саҥа тахсарын элбэхтик истэбит. Манна Сунтаардааҕы РЭС начальнига Николай Игнатьев маннык хоруйдуур: «Биһиги үлэбит барыта дьон туһугар буолар. Уот араарар түгэннэрбит ыытыллар үлэ куттала суох барарыгар туһаайыллар. Барыта былааҥҥа киирэр. Нэһилиэнньэни эрдэттэн сэрэтэбит. Сайыҥҥы, күһүҥҥү кэмнэргэ ыарахан уйуктаах тиэхиньикэлэр кыайан киирбэт сирдэригэр үлэ барбат, сир тоҥноҕуна эрэ кыаллар. Аны уот күүрэр, мөлтүүр кэмигэр ыаллар электрооборудованиелара, уот ситимэ алдьаныан сөп. Ол инниттэн уот кыамтатын хонтуруоллуурга итинник үлэ ирдэнэр. Түгэнинэн туһанан биһиги өҥөбүтүнэн туһанааччыларбытын болҕомтоҕут, тулуургут, үлэбитин өйдүүргүт иһин махталбытын биллэрэбит».
Ханнык баҕарар тэрилтэ киэн туттар дьонноох. Сүүстэн тахса үлэһиттээх электростанция тэрилтэтэ таһаарыыылаах үлэлээх, элбэх идиэйэлээх, ыарахантан чаҕыйан турбат туруу үлэһиттэрдээх. Ол курдук, улуус кылаабынай инженера — Юрий Возненко, электромонтер ОВБ — Егор Семенов, СПКиОТ исписэлииһэ — Тимур Данилов, суоппар — Михаил Иванов, диспетчер — Николай Уаров, массыынаны өрөмүөннүүр слесарь — Алексей Николаев, ВЛЭП өрөмүөнүгэр электромонтер — Дмитрий Максимов.

Үөрүүлээх күнүнэн энергетика салаатын бары үлэһиттэрин, ытыктабыллаах бэтэрээннэри идэлээх бырааһынньыкытынан истиҥник эҕэрдэлиибит!

Алена ИВАНОВА

 

Читайте дальше