Бүгүн, ахсынньы 26 күнүгэр, Сунтаарбыт улууһугар биир өрөгөйдөөх түгэн үүннэ. Ол курдук Абаҕа түөлбэтигэр саҥа култуура-успуорт саалата үөрүүлээхтик аһылынна.
Бу эбийиэги «Саха сирэ 21-с үйэҕэ» үтүө дьыала тосхолунан, СӨ уонна Сунтаар улууһа кыттыгас үбүлээһинининэн «Сахаеврострой» ХЭТ тутан үлэҕэ киллэрдэ.
Саала аһыллыытыгар Саха сирин Ил Дархана Айсен Николаев куйаар ситиминэн, быһа холбонуу нөҥүө бу үөрүүлээх тэрээһиҥҥэ кытынна. Бу күн Ил Дархан Саха сирин үрдүнэн уопсайынан 9 саҥа эбиэги арыйда.
Ону таһынан, бу күн СӨ успуорт миниистирин солбуйаччы Гаврил Мохначевский биир үтүө ыалдьыт буолла.
Абаҕа түөлбэтин олохтоохторо, аныгы кэмҥэ эппиэттиир, араас тэрээһин ыытарга уонна дьон успуордунан дьарыктанарыгар, бары өттүнэн сөптөөх, табыгастаах култуура уонна успуорт саалаланан, саҥа сылы көрсөргө бэлэмнэр.
Дмитрий ЫМЫЧАНОВ