Бүгүн, ыам ыйын 1 күнүгэр Үлэ, Эйэ, Маай бырааһынньыгар уонна Сунтаарбыт улууһугар Аҕам саастаах дьоҥҥо ытыктабыл сылын чэрчитинэн, «Партизан» норуот айымньытын театральнай киинигэр сэбиэскэй кэмҥэ Сунтаар нэһилиэгэр тэриллэн үлэлии сылдьыбыт тэрилтэлэр тустарынан «Ааспыты санаан аастахха…» диэн олус истиҥ ахтыы киэһэтэ быйыл иккис сылын тэрилиннэ.
Бу тэрээһиҥҥэ билигин суох, ол эрээри бэйэлэрин кэмнэригэр, сэбиэскэй сойуус сылларыгар, олус таһаарыылаахтык үлэлээн-хамсаан олорбут тэрилтэлэргэ үлэлээбиттэри ыҥыран, иһирэх кэпсэтии буолла. Ол курдук, райпромкомбинакка, сельхозтехникаҕа, бытовой кэмбинээккэ, райпотребсойууска, «Сунтаар» сопхуоска үлэлээбит дьон тэрилтэлэрин, үлэлээн ааспыт сылларын туһунан ахтыы оҥордулар.
Бүгүҥҥү тэрээһин көрөөччү саалатыттан саҕаланна. Ол курдук урукку үлэлээн ааспыт тэрилтэлэр эмблемаларын саҥарданнар олус кэрэ көстүүлээх сыанаҕа «Көҕүөр» хора ахтыы түһүлгэтин ылбаҕай ырыаларынан арыйдылар. Сунтаар нэһилиэгин бэтэрээннэрин сэбиэтин бэрэссэдээтэлэ Наталья Кокорева мустубут бэтэрээннэрин истиҥник эҕэрдэлээтэ. Кэрэ бэйэлээх «Кыталык» кыргыттар бөлөхтөрө Наталья Софроновна эҕэрдэтин ырыанан ыпсаран биэрбиттэрэ истиҥ көстүү буолла. Салгыы «Сунтаар» сопхуоска үлэлии сылдьыбыт Розалия Сидорова, АТК тэрилтэҕэ өр кэмҥэ үлэлээбит Людмила Петрова уонна Владимир Петров эҕэрдэлэрин уонна истиҥ санааларын тириэртилэр. «Партизан» НАТК үлэһиттэрэ Альберт Горохов, Роман Амонов уонна Айсен Федоров эҕэрдэ ырыаларын бэлэх ууннулар.
Ол кэннэ мустубут дьон фойеҕа тахсан, толору астаах сандалы тула олорон, итии чэйи иһэ-иһэ атах тэпсэн олорон ааспыты ахтыһан, истиҥник ирэ-хоро кэпсэтэн, оонньоон-көрүлээн, күрэстэһэн илии тутуурдаах, өттүк харалаах астынан-дуоһуйан тарҕастылар.
Үйэлэрин тухары үлэ үөһүгэр сылдьан үгүһү үлэлээбит аҕам саастаах дьоҥҥо маннык тэрээһиннэр инникитин да тэриллэн ыытылла туралларыгар баҕа санааларын эттилэр. Ити курдук үлэнэн дьолломмут үтүө сыллары эргитэр, ааспыты санатар ахтыы дьоро күнэ олус истиҥ, сылаас тыыҥҥа буолан ааста. Эһиилги сылга бу тэрээһини ыам ыйын 21 күнүгэр сайыны көрсөр үтүө күҥҥэ айылҕаҕа тэрийэргэ былааннастылар.
Тэрээһини көҕүлээн тэрийбит Сунтаар нэһилиэгин баһылыгар Эдуард Филипповка уонна олохтоох дьаһалта үлэһиттэригэр, Юрий О салайааччылаах «Партизан» НАТК кэлэктиибигэр, Сунтаар нэһилиэгин бэтэрээннэрин сэбиэтин активтарыгар уонна бэрэссэдээтэлигэр Наталия махталларын эттилэр.
Сунтаарбыт нэһилиэгин бар дьонун урукку сабыллыбыт тэрилтэлэр хаартыскаларын бу сигэнэн https://suntar-dobun.saha.muzkult.ru/news/94686356 киирэн көрүҥ.
Айсен ФЕДОРОВ