Ааспыт 2024 сыл дойдубутугар Дьиэ кэргэн, Сахабыт сиригэр Оҕо саас сыллара биллэриллэн, бэйэ-бэйэлэрин ситэрсэн, бу эйгэҕэ үгүс тэрээһиннэрдээх, ситиһиилэрдээх түмүктэннэ. Дьиэ кэргэҥҥэ, оҕо-аймахха туһуламмыт судаарыстыбаннай бэлиитикэни хаҥатарга, дьиэ кэргэн сыаннастарын харыстыыр соруктаах араас хабааннаах көмөлөр, бырайыактар, бырагыраммалар, олоххо киирэн, манан тохтоон хаалбакка өссө кэҥээн, салҕаныахтара.
Дьиэ кэргэн бигэ туруктаах, социальнай көмүскэллээх буолуутугар улахан суолта уонна болҕомто ууруллар. Элбэх оҕолоох дьиэ кэргэни өйүүр, олоҕо тупсарыгар, туруктаах буоларыгар иккис, онтон кэлэр оҕолору төрөппүт ыалга көрүллэр ийэ хапытаала төһүү күүс буолар. Ону тэҥэ, Ил Дархан ыйааҕынан, элбэх оҕолоох ыалга хомунаалынай төлөбүрдэргэ чэпчэтии оҥоһулунна, оскуолаҕа босхо аһыыллар, судаарыстыбаннай уонна муниципальнай түмэллэргэ босхо киириэхтэрин сөп. 25 саастарыгар диэри ыал буолар эдэр дьоҥҥо биирдэ харчынан төлөбүр баар буолла, “Дьиэ кэргэн” өрөспүүбүлүкэтээҕи ийэ хапытаала 300 тыһ.солкуобайга тэҥнэстэ, демография уонна дьиэ кэргэн бэлиитикэтигэр үчүгэй көрдөрүүлээх муниципалитекка Саха сирин Ил Дарханын грана олохтонно.
Улууспут киэн туттар дьиэ кэргэттэрин бэлиэтээн аастахха СӨ «Тапталлаах уонна бэриниилээх буолуу» түөскэ кэтиллэр мэтээл хаһаайыттара Константин Михайлович, Марфа Николаевна Контогоровтар уонна Пантелеймон Максимович, Антонина Михайловна Семеновтар дьиэ кэргэттэрэ. Өрөспүүбүлүкэтээҕи «Сыл бастыҥ дьиэ кэргэнэ-2024” күрэскэ «СӨ кыһыл көмүс дьиэ кэргэнэ», «СӨ тыа сирин дьиэ кэргэнэ» күрэс кыттыылаахтара Розалия Антоновна, Иннокентий Иннокентьевич Алексеевтар, «СӨ эдэр дьиэ кэргэн» күрэс кыттыылаахтара Ксения, Дмитрий Погодаевтар, «СӨ элбэх оҕолоох дьиэ кэргэнэ” күрэс кыттыылаахтара Варвара Валентиновна, Иван Владиславович Тихоновтар буолаллар.
Оҕо саас сылынан успуорт, үөрэҕирии, култуура о.д.а. эйгэлэригэр үтүмэн үгүс кыайыылар, умнуллубат түгэннэр тосхойбуттара. Ол курдук, кылгастык бэлиэтээн аастахха Мария Тараярова «Гран-при Монтенегро» оҕунан ытыыга норуоттар икки ардыларынааҕы күрэхтэһиигэ 21 саастарыгар диэри классическай оҕунан ытыыга чөмпүйүөннээбитэ уонна хамаанданан эмиэ кыһыл көмүс мэтээли ылары ситиспитэ. «Азия оҕолоро» оонньууга буулдьанан ытыы көрүҥэр Виктория Ераскумова үрүҥ көмүс мэтээл хаһаайынынан буолан ситиһии көтөллөммүтэ. Сунтаардааҕы политехническай лиссиэй-интэринээт 8-с кылааһын үөрэнээччитэ Давид Зорин СӨ экология миниистирин анал бирииһин ылбыта. Кини өрөспүүбүлүкэтээҕи научнай-практическай конференцияҕа сүүмэрдиир түһүмэҕи ааһан, кыайыылаах үрдүк аатын ылбыта. «Түһүлгэ» норуодунай фольклорнай үҥкүү бөлөҕө Москва куоракка ыытыллыбыт «Золотая осень» норуоттар икки ардыларынааҕы бэстибээл-күрэскэ Гран-при хаһаайыттара буолбуттара (сал. Матрена Лазарева, Иван Лазарев) о.д.а.
Үүммүт сыл үтүмэн үтүө үктэллэрдээх, өссө үрдүк ситиһиилэрдээх аастын.
Алена ИВАНОВА