Бачча сааспар диэри араас мистэр, миссистэр, мистердэр күрэстэрин көрдүм ини, көрбөтүм ини?! Оттон бу били Сайа: «Сунтаар ааттыын да ААР» диэбитин курдук «Аар Кудай» тэрээһин ааттыын да аар тэрээһин буолаары гынна дии саныыбын.
Бастатан туран, кыраһаабыссалары талыы урукку күрэстэргэ кылгастык тохтоон бэйэм тус санаабын суруйуум. Ол курдук, урукку кырасаабыссалар күрэхтэрэ бүтүн өрөспүүбүлүкэни да хаптар, маннык аарыма буолбаттар этэ. Олох эт-хаан, өй-санаа өттүнэн ситэ-хото илик уу ньулдьаҕай оскуола кыргыттарыттан саҕалаан кыттааччылар. Аҥаардас тас кэрэ көрүҥүнэн көөчүктэнии курдук буолааччы. Ол эрээри бу маннык күрэстэри куһаҕан диэбэппин. Күрэс тутула да атын буоллаҕа.
Оттон бу «Аар Кудайга» саха дьахтарын сиппит-хоппут, бары өттүнэн дэгиттэр, бастыҥ, инники кэккэҕэ сылдьар, сайдыыны түстэһэр, хамсатар Далбардар кытта сылдьаллар. Кудай диэн тылы мин кут-сүр, ис кэрэ диэн өйдүүбүн, онтон кини өссө Аар эбиилээх буоллаҕына Сүдү, улахан, кэрэ, киэҥ айар куттаах-сүрдээх, ис кэрэлээх дьахталлар саастарыттан, элбэх оҕолоохторуттан тутулуга суох кытта сылдьаллар.
Бу күрэскэ кыттааччыларга аналлаах араас бэлэмниир, тургутар тэрээһиннэрэ элбэҕэ сөхтөрөр. Аҥаардас “Аһымал” акцияҕа кыттыбыттара, бу күрэс аҥаардас тас дуй буолбатаҕын көрдөрдө дии саныыбын.
Араас маастар кылаастарга, лекцияларга дьахталлар сатабылларын, билиилэрин өссө кэҥэттилэр, ону дойдуларыгар тиийэн атын дьүөгэлэри кытта үллэстиэхтэрэ, онон бу бырайыак өссө кэҥиэ, элбэх киһини хабыа.
Дьэ, хаартыскаҕа хатыыр да буолар эбиттэр. Кыргыттар итинник аһыллаллар дуу, түһэрээччи итинник кыраҕы харахтаах буолан чыпчылҕан түгэни хабар дуу?! Кыргыттар дууһалара киһи иннигэр ыраас хаар суругун курдук нэлэс гынар. Олус үчүгэй да, сэрэхтээх да курдук. Маннык бырайыагы толкуйдаабыт тэрийээччилэргэ улахан махтал, өссө инникитин элбэх сонун, дириҥ, киэҥ ис хоһоонноох үлэлэри.
Кыттааччыларга туһаайан этэбин: итиннэ аҥаардас тиийбиккитинэн, кытта да сылдьаргытынан эһиги бары кыайыылаахтаргыт (баҕа санааҕытын толордугут, өрөспүүбүлүкэ бастыҥнарын кытта алтыстыгыт, сайынныгыт, элбэх дьүөгэлэрдэннигит, элбэх арыйыыны оҥорбут буолуохтааххыт…). Эбэһээт Кыайыы – хотуу эрэ диэн кынаттаммакка, аҥаардас үөрүү-көтүү үктэллэнэн сылдьыҥ!
Зинаида ФЕДОТОВА-Дьол Кыыма