Улууспутугар “Аҕам саастаахтарга ытыктабыл” сыла биллэриллэн араас хабааннаах үлэлэр ыытыллыахтара. Ол курдук, улуус баһылыгын социальнай имиджевай бэлиитикэҕэ солбуйааччыта Гаврил Еремеев салайыытынан бу сылга анаан, былааннаммыт үлэлэри чопчулуур мунньах буолла.
Бу манна култуура, үөрэҕирии, ыччат, социальнай эйгэ, балыыһа, бэтэрээн сэбиэтин бэрэссэдээтэлэ кыттыылаах тэрилтэ салайааччылара уонна үлэһиттэрэ былааннарын сырдаттылар.
Гаврил Михайлович:
— Аҕам саастаах дьоммутугар анаан хас биирдии тэрилтэлэринэн, нэһилиэктэринэн араас үлэлэр быланнанан ыытыллыахтара. Ол курдук, куруорка, санаторийдарга баралларыгар үлэлэһиэхпит, болҕомтону күүһүрдүөхпүт. Лааҕырдар тэриллиэхтэрэ, дьиэлэригэр толору хааччыллыыны киллэриигэ, нэһилиэктэргэ баар түмэллэринэн экскурсия-тур былааннаналлар. Быйыл 90 саастарыттан үөһэ аҕам саастаах дьоҥҥо “Ытык кырдьаҕас” бэлиэ туттарыллыа. Балыыһа өттүнэн этэр буоллахха аһаҕас ааннар, дьиэлэринэн сылдьан көрүү, диспансеризация о.д.а. үлэлэр ыытыллыахтара. Аҕам саастаах дьоммут олохторо туруктаах буоларын, тупсарын туһугар ити курдук араас хабааннаах тэрээһиннэр, үлэлэр бары эйгэни хабан туран ыытыллыахтара.
АЛЕНА ИВАНОВА.