Бу күннэргэ Николай Васильевич: «Улууспут баһылыга Анатолий Григорьев быйылгы сылы Аҕам саастаахтарга ытыктабыл сылынан биллэрбитинэн уонна кэлэр сылга Улуу кыайыы 80 сыллаах үбүлүөйүнэн нэһилиэкпит кырдьаҕастарыгар «Сунтаар сонуннара» хаһыаты сурутан бэлэх уунар санаалаахпыт» диэн төлөпүөнүнэн кэпсэтэ сылдьыбыта. Ол кэннэ тутатына, Кутана олохтоох дьаһалтата нэһилиэккэ олорор тыыл бэтэрээннэригэр, сэрии сылын оҕолоругар, ону сэргэ үбүлүөйдээх саастарын бэлиэтиир кырдьаҕастарыгар «Сунтаар сонуннарын» сурутан биэрдилэр.
Бүгүн кырдьаҕастар күннэрин бэлиэтиир тэрээһиннэригэр сөп түбэһиннэрэн, 28 кырдьаҕаска «Сунтаар сонуннарын» кэлэр 2025 сылга толору суруттарбыттарын туһунан иһитиннэрэн туран, квитанцияларын туттардылар. Кырдьастар соһуччу бэлэхтэн сүрдээҕин астыннылар уонна: «Баһылыкпытыгар Николай Васильевичка, дьаһалта бары исписэлиистэригэр болҕомтоҕут иһин дириҥник махтанабыт» диэн үөрбүттэрин биллэрдилэр.
Яина ВЛАСЬЕВА