Ааспыт нэдиэлэҕэ Сиэйэ нэһилиэгэр аан дойду үрдүнэн бэлиэтэнэр Аҕам саастаахтар күннэрин бэлиэтээтибит. Тэрээһин аһара бэркэ табыллан барда. Ардах самыыр диэн иҥнэн-толлон турбакка добуочча элбэх киһи кэлбит. Аан тылы баһылыкпыт Александр Романов нэһилиэкпитигэр туох үлэ барбытын, үлэлэнэ турарын өссө туох үлэ күүтэрин сиһилии билиһиннэрдэ. Оскуолабытыгар саҥа ананан кэлэн, дириэктэринэн кэлэн үлэлээн эрэр эдэр бэйэбит уолбут Вячеслав Федоров оскуолатын олоҕуттан билиһиннэрдэ. Бэрт үчүгэй, сэргэх тыллаах- өстөөх оҕо үлэлээн эрэр эбит. Оҕо саадын сэбиэдиссэйэ Ариянна Осипова тэрилтэтин үлэтин сырдатта. Бибилэтиэкэр кыыспыт аҕам саастаахтар декаадаларын чэрчитинэн туох үлэни былааннаабытын кэпсээтэ. Саастаах дьон биир кыһалҕалаах боппуруоспут төлөппүөммүтүгэр интэриниэт ситимигэр онлайн сыһыарыыны киллэрии. Бу сыһыарыыны киллэрэн биэрэргэ көмөлөһүөм диэн бибилэтиэкэҕэ күүтэрин биллэрдэ. Социальнай эйгэ үлэһитэ Нарыйа Васильева торт оҥорон күндүлээн барыбытын оҕо курдук үөрдүтэлээтэ. Ийэтин Надежда Дмитриевна Васильева курдук торт астаабытын ахтан-санаан аастыбыт. Спортинструктор Андрей Михайлов «Дартс” диэн күрэҕи тэрийэн бэркэ сэргэхситэлээтэ.
Кэлбит дьон сүргэлэрэ көтөҕүллэн эдэрдэригэр түһэн ырыа-тойук буоллулар. Марфа Архангельская ырыатын истибэтэх ырааппыт эбит. Куолаһа эбии тупсан иһэр. Елизавета Степановна саҥа хаһан да истибэтэх ырыабытын ыллаан сөхтөрдө. Трофим Егоров эмиэ аһара табыллан ыллаата. Ытык кырдьа5аспыт 95 саастаах Фекла Попова ыллаан олох ырыа конкуруһугар кыттара буоллар Гран при бириистэрин ылыа этэ дэстибит.
Хаһан баҕарар буоларын курдук, кулууп кыргыттара кими да чуҥкутан олордубакка тэрээһини кыайа-хото тутан ыыттылар. Кыргыттарбыт боппуруос-эппиэт өй оонньуутун, таабырын таайтардылар араас оонньууну оонньоттулар.
Бу күн биир саамай наадалаах, инньэ быйыл саастан турбут боппуруос быһаарылынна. Нэһилиэк кырдьаҕастарын сэбиэтин бэрэссэдээтэлинэн эдэр эрчимнээх Нина Максимова биир санаанан куоластаан талылынна. Ким да туора турбакка көмөлөһүөхпүт диэн тылларын биэрдилэр.
Хас бырааһынньык аайы баһылык солбуйааччыта Арсен Семенов бэйэтин массыынатынан илдьэн, аҕалан биэрэн абырыыр. Саастаах дьоҥҥо сыһыанын аһара да хайҕыы көрөбүн. Нэһилиэкпит баһылыгар, эдэр саҥа үлэлээн эрэр тэрилтэ салайааччыларыгар, үлэһиттэригэр аҕам саастаах дьон ааттарыттан үлэһитигэр ситиһиилэри уонна улахан махталбытын тириэрдэбит.
Мария ЕФИМОВА,
Ю.М.Гурьева аатынан култуура киинин дириэктэрэ