Аҕам саастаах дьон норуоттар икки ардыларынааҕы күнэ 1991 сылтан сыл аайы алтынньы 1 күнүгэр бэлиэтэнэр. Кинилэр элбэх сыллар усталарыгар билбит киэҥ билиилэригэр, баай холобурдарыгар, көлүөнэ ситимигэр сүбэ-ама буолалларыгар махтанан сүгүрүйүү, ытыктабыл бэлиэтэ буолар.
Ол курдук, улууспутугар бүгүн С.А. Зверев — Кыыл Уолун аатынан норуот айымньытын киинигэр ытык кырдьаҕастарбытыгар аналлаах тэрээһин үөрүүлээх аһыллыыта саҕаланна. Аҕам саастаах дьоҥҥо болҕомтону, истиҥ кыһамньыны уурарбытын санатан, кинилэр олохторун хаачыстыбатын тупсарыыга уопсастыбаннас болҕомтотун тардан, араас хабааннаах тэрээһиннэр ый устата тиһигин быспакка ыытыллыахтара.
Бүгүн мустубут ытык кырдьаҕастарбытыгар норуот айымньытын киинин үлэһиттэрэ сып-сылаас, сып-сымнаҕас саһархай алаадьынан, утары миэстэтигэр буһаран күндүлээтилэр. Ону тэҥэ Сунтаар коллекционердара хас эмэ сылы быһа кичэллээхтик харайан муспут бэйэлэрин араас коллекцияларын аҕалан выставкалаатылар. Манна кып-кыра самоварчиктар, значоктар, урукку харчылар, кэмпиэт суулара, уруучукалар, чуораанчыктар уо.д.а киһи эрэ кэрэхсии, сэҥээрэ көрөр маллара бааллар.
Люция Семенова, коллекционер: «Мин коллекциябын 2010 сылтан саҕалаан хомуйбутум. Бастаан утаа буолары буолбаты барытын муһа сатыыр этим. Онтон чуораанчык бэлэхтээбиттэрин кэннэ, хараҕым чуораанчыкка хатаммыта. Доҕотторум уонна бэйэм араас дойдуттан аҕалан коллекциябын хаҥатабын. Сиэним эмиэ уһуйааҥҥа сылдьар кэмиттэн саҕалаан араас брелоктары муһар. Балары анаан минээн өстүөкүлэ долбуурдаах, сиэркилэлээх ыскаап сакаастаан ууран турабын. Маннык үлүһүйэрбинэн дууһам астынар».
Маны сэргэ викторина, араас маастар-кылаастар уонна кэнсиэр буолла. Улууспут Аҕа баһылыга Анатолий Григорьев эҕэрдэ тылы эттэ. Кинилэр олохторун укулаата тупсарыгар ананаан, быйыл 2024 сылы Аҕам саастаах дьоммутугар ытыктабыл сылын биллэрбитэ саамай оруннаах.
Күндү дьоммут, эһиги күүскэ үлэлээн, судургута суох олоххо уһуннук уонна сиэрдээхтик олорон эдэр көлүөнэ ытыктабылын ылаҕыт. Тапталга уонна кыһамньыга бигэнэн, этэҥҥэ үөрэ-көтө сылдьыҥ.
Елизавета ТИТОВА