Байыастарга анаан көмөҕө бары кыттыһабыт

Анал байыаннай дьайыыга сылдьар биир дойдулаахтарбытыгар улуус олохтоохторо көмөлөрүн ыыта олороллор. Кинилэр  уолаттарбыт этэҥҥэ сырыттыннар диэн илиилэрин сылааһын иҥэрэн, бэйэлэрин ис дууһаларыттан тахсар алгыс тылларын этэн туран биэрэр көмөлөрө чахчы, ол онно сылдьар байыастарбыт санааларын бөҕөргөтөр, кыайыыга кынаттыыр.

«Харысхал» түмсүү сиэккэ өрөр волонтердара билиҥҥи туругунан 80-тан тахса сиэккэни бэлэмнээтилэр. Нэһилиэктэртэн эмиэ өрүллүбүт сиэккэлэри аҕалан туттараллар. Ол курдук, күн бэҕэһээ Бордоҥ нэһилиэгэ 6 сиэккэни уонна ыраастанарга, арчыланарга туттуллар алгыстаах оттору аҕаллылар. Волонтердарга көмөлөһө оскуола үөрэнээччилэриттэн аҕам саастаахтарга тиийэ кэлэллэр.

Маны сэргэ байыастарга анаан эмп-томп, таҥас-сап, минньигэс кэһиилэр нэһилиэктэртэн, тэрилтэлэртэн, биирдиилээн дьонтон кэлэ турар.

Холобур, Михаил Николаев баһылыктаах Туойдаах нэһилиэгин олохтоохторо биир улахан коробка эмп-томп арааһын киллэрдилэр. Кириэстээх нэһилиэгин баһылыга Александр Григорьев олохтоохтор ааттарыттан сылаас таҥас-сап, арчылыыр, ыраастанар набор, Умтичаана бэлэмнээбит мүөттэриттэн маас аҕалан туттарда.  Сунтаар аэропордун кэлэктиибэ бастакы уочарат уолаттарбытыгар эмп-томп олус наадалаах диэннэр бир дьааһык эмп аҕалан туттардылар.

 

«Харысхал» түмсүү бу күннэргэ араас кээмэйдээх 29 сиэккэни ыытаары бэлэмнээтилэр. Бу сиэккэлэри сэргэ таҥас-сап, эмп-томп, о.д.а. кытары бааллар. Бүгүн «Харысхал» түмсүү баһыылкалары  улуус дьаһалтатын дэлэгээссийэтэ СВО-ҕа сылдьар уолаттарбытын көрсө, билсэ баралларыгар  туттардылар.

Бу курдук, анал байыаннай дьайыыга сылдьар биир дойдулаахтарбытыгар аадырыстаммыт көмө тиһигин быспакка оҥоһуллар. Бары биир санаанан сомоҕолоһон, түмсэн кыайыыны чугаһатабыт.

Яина ВЛАСЬЕВА