Олунньу 25 күнүгэр А.П. Павлов аатынан Сунтаар 1-кы №дээх оскуолатыгар «Я — учитель будущего» психологическай-педагогическай кылаастар муниципальнай пуорумнара буолан ааста. Манна Элгээйиттэн уонна Сунтаар 1-кы №дээх оскуолатыттан барыта 56 үөрэнээччи түмсэн, уопуттарын уонна билиилэрин-көрүүлэрин атастастылар, педагогическай өйү-санааны сайыннарарга көдьүүстээх үлэҕэ кытыннылар.
Билигин РФ үөрэҕириитин тиһигэр үөрэх тэрилтэлэригэр квалификациялаах педагогическай каадырдар тиийбэттэрэ сүрүн кыһалҕа буолар. Каадыр кыһалҕатын өссө оскуолаҕа үөрэтииттэн саҕалаан, үөрэнээччилэри учуутал идэтигэр уһуйан, кыахтарын арыйар наадалаах. Уопуттаах учууталлар, психологтар кыттыһан бииргэ үлэлээһин ураты эйгэтин тэрийдилэр.
Үөрэх салалтатын салайааччыта Борис Васильев бэйэтин этиитигэр улуус үөрэхтээһин сайдыытын стратегическай хайысхаларын бэлиэтээн, эдэр исписэлиистэри өйөөһүҥҥэ улахан болҕомто ууруллуохтааҕын бэлиэтээтэ.
Пуорум аһыллыытын кэнниттэн төгүрүк остуол үлэтэ саҕаланна, манна экспертэр психологическай-педагогическай үөрэхтээһин сайдыытын тирээн турар боппуруостарыгар аналлаах дакылааттарын билиһиннэрдилэр. Үөрэх салалтатын каадырынан хааччыйыы отдел сэбиэдиссэйэ Елена Егорова «Психологическай-педагогическай кылаастар» муниципальнай бырайыак сыалын, соруктарын уонна кэскиллэрин кэпсээтэ. Педагогическай кылаас үлэтин уопутун А.П. Павлов аатынан Сунтаар 1-кы нүөмэрдээх оскуолатын дириэктэри иитэр-үөрэтэр үлэҕэ солбуйааччы Розалия Данилова кэпсээтэ. П.Х. Староватов аатынан Элгээйи орто оскуолатын психологическай-педагогическай кылаас салайааччыта Туяра Миронова оскуолаларыгар педагогическай кылаас үлэтин уопутун, инновационнай ньымалары сырдатан интэриэһинэй дакылааты оҥордо.
Пуорум иккис «Педагогическай марафон» түһүмэҕэр уопуттаах педагогтар ситиһиилэрин үллэһиннилэр. Профессиональнай куоҥкурустар кыайыылаахтара уруоктары бэлэмнээһин кистэлэҥнэрин арыйдылар. Ол курдук, А.П.Павлов аатынан Сунтаар 1-кы нүөмэрдээх оскуолатын дириэктэри иитэр үлэҕэ солбуйааччы Дмитрий Михайлов «Что такое урок и с чем его едят?» диэн ураты дакылааты оҥордо. Сунтаар политехническай лиссиэй технологияҕа учуутала Любовь Федорова бэйэтин этиитигэр үөрэнээччилэр уонна кинилэр айар дьоҕурдарын сайыннарар аныгы технологиялары хайдах туһаныахха сөбүн кэпсээтэ. Ону таһынан, В.Ф. Абрамович аатынан Устье оскуолатын математикаҕа учуутала Юлия Хабибуллина, Л. Попов аатынан Арыылаах орто оскуолатын физикаҕа учуутала Евдокия Джуалова үлэлэрин уопуттарыттан кэпсээтилэр.
Ону сэргэ пуорум чэрчитинэн «Движение первых» исписэлиистэрэ тэрийиилэринэн улуустааҕы куоҥкурус буолан ааста. Кыттааччылар «Мы — будущие учителя» тиэмэҕэ видеовизиткалары билиһиннэрдилэр уонна интеллектуальнай карта оҥорон күрэхтэстилэр.
Тэрээһин рефлексиянан түмүктэннэ. «Я — учитель будущего» пуорум аныгы үөрэх эйгэтигэр педагогтар саҥа көлүөнэлэрин үөскэтиигэ улахан тирэх буоларын туоһулаата. Үөрэнээччилэр уопуттаах учууталлартан элбэх саҥа билиилэри ылан, салгыы үөрэнэллэригэр, үүнэллэригэр-сайдалларыгар туһаныахтара диэн эрэнэбит.
