Биир сүбэни ылынан, үлэлиэҕиҥ, түмсүөҕүҥ

Сунтаар улууһун баһылыгын 1-кы солбуйааччы Павел Григорьев Ил Дархан Айсен Николаев үгэс буолбут Ил Түмэҥҥэ туһаайан этиитин истэн, бэйэтин санаатын маннык үллэстэр:
— Бу анал этиитигэр кини өрөспүүбүлүкэбит бары хайысхатыгар болҕомтотун уурда. Тыа хаһаайыстыбатын салаатын сайдыытыгар элбэх болҕомтону ууруохтаахпытын бэлиэтээтэ. Улуустар тыа хаһаайыстыбатын боломуочуйаларын иһинэн үбүлээһини ханнык хайысхаҕа тутталларын бэйэлэрэ быһаарар кыахтаныахтарын иһитиннэрдэ. Бэйэ оҥорон таһаарар хаачыстыбалаах бородууксуйатын элбэтии соругун туруорда.
Өрөспүүбүлүкэбитигэр туризмы күүскэ сайыннарарга үлэ барыахтааҕын өссө төгүл тоһоҕолоон эттэ. Ол туһугар араас бырайыактары олоххо киллэрэр наадатын ыйда. Бу манна туризм эйгэтигэр каадыры бэлэмнээһинигэр болҕомто ууруохпутун наада. Нэһилиэнньэ олоҕун хаачыстыбата тупсарыгар үгүс санааларын эттэ. Үөһэттэн болҕомто, өйөбүл баар буоллаҕына тыа сириттэн көһүү аҕыйыа этэ.
Айсен Николаев быйылгы Анал этиитин байыаннай дьайыы кыттыылаахтарыгар, кинилэр дьиэ кэргэттэрин өйөөһүҥҥэ улахан болҕомто ууруллуохтааҕын бу да сырыыга тоһоҕолоон бэлиэтээтэ.
Ил Дархаммыт Айсен Николаев үүнэр сылы Ийэ дойдуну көмүскээччи сылынан биллэрбитин олус сэргии иһиттим. Эһиил Кыайыы 80 сылын бэлиэтиэхпит. Ону таһынан бу биллэриллибит сыл ыччаты, үүнэр көлүөнэни патриотическай өйгө-санааҕа иитиигэ олук буолуоҕа.
Өрөспүүбүлүкэбит, улууспут сайдарын туһугар, дьоммут-сэргэбит олоҕо тупсарыгар бары биир сүбэни ылынан, өрөспүүбүлүкэбит Баһылыгын Айсен Николаев тула түмсэн үлэлиэҕиҥ, түмсүөҕүҥ!

Павел ГРИГОРЬЕВ, 

Сунтаар улууһун баһылыгын 1-кы солбуйааччы

Читайте дальше