Бүгүн, балаҕан ыйын 30 күнүгэр СӨ Бырабыыталыстыбатын бэрэссэдээтэлин солбуйааччы Сергей Местников Сунтаар улууһугар үлэ сырыытынан, тутулла турар эбийиэктэри уонна саҥардыы үлэтэ барыахтаах сирдэри көрдө-иһиттэ.
Бастатан туран, Кириэстээх нэһилиэгэр «Култуура» национальнай барыл иитинэн тутулла турар, «Саргы түһүлгэтэ» култуура киинигэр, тутуу үлэтэ тэтимнээхтик баран иһэрин билистэ. Ол кэннэ, СХПК «Кириэстээх», 500 төбө хороҕор муостааҕы тутан турар, Кириэстээх отделениетын хотонугар сылдьан, хаһаайыстыба туох кыһалҕалааҕын, итиэннэ Үлэ Дьоруойа Владимир Михайлов санаатын иһиттэ. Бу хотон 1986 сылга тутуллан баран, өрөмүөн үлэтигэр бэйэ күүһүнэн үп-харчы өттүгэр тэрилтэ улахан охсууну ылар. Онон хапытаалынай өрөмүөн үлэтигэр, үбүлээһиҥҥэ көмө баара буоллар диэн туруорсаллар.
Салҕыы Сунтаар сэлиэнньэтигэр тутулла турар үс мэндиэмэннээх бассейн тутуутун уонна үлэ хаамыыта хайдах баран иһэрин бэрибиэркэлээтэ. «Тутуу Саха» хааччахтаммыт эппиэтинэстээх уопсастыба тутуу үлэтин күн бүгүн 69% толорон олорор. Ол курдук, быйыл муус устар ыйга аукциону кыайан, билигин эбийиэк ис-тас үлэтин кэмигэр толорон үлэни ыыта сылдьаллар. Саамай сүрүн боппуруос кинилэргэ паром сырыытын баттаһа тутуу матырыйаала кэлиэн наада. Кистэл буолбатах, бу иннигэр тутууну ылсан үлэлээбит тэрилтэ итэҕэстэрин, билигин ситэрэн-хоторон эбийиэк ис-тас үлэтин үмүрүтэ сылдьаллар. Сибилиҥҥи туругунан 44 киһи үлэлии сылдьар, өссө да үлэһиттэр кэлиэхтэрэ диэн, тэрилтэ генеральнай дириэктэрэ Нюргун Саввин сэһэргээтэ . Сергей Местников ититии ситимин түргэнник киллэрэн, ис үлэтигэр үлэни тэтимирдэн биэрэллэригэр сорудахтаата. Баар боппуруостарга салҕыы үлэлэһэр соругу уолдьаста.
Эһиил буолуохтаах, С.А.Зверев — Кыыл Уола 125 сылын бэлиэтиир үбүлүөйдээх ыһыах чэрчитинэн Г.Н. Саввинов — Уус Киргиэлэй аатынан сынньалаҥ уонна култуураа пааркатыгар, ону тэҥэ В.И. Крыжановскай аатынан ипподромҥа саҥардыы үлэтин билистэ.
Елизавета ТИТОВА.